Friday, August 10, 2018

La Manu Pombu La Kabas Rahun (espresaun poétika 145)

La  Manu Pombu La Kabas Rahun
 (i)
Ó mai hosi oin, sama hetan nia
Nia hakfodak namkari, semo loro leten
Ha’u hasoru sala ó, sama kona nia
Nia hakfodak namkari, semo liután
(ii)
Sira tuir ha’u kotuk, simu tutan nia
Sidi nia namkari, semo bá beibeik
Nia kor malahuk, la manu pombu
La’ós kabas rahun, la borboleta
(iii)
Nia mak rai rahun estrada foun
Bá mai loro-sa’e, liu Hera Metinaru sei simu nia
Liu bá, liu mai sei horon nia
Nia mak belun-at lurón nian
(iv)
Nia mak rai rahun estrada foun.
Prepara ó-nia oklu, hatook ó-nia maskra
Tau oklu ó matan, sulan metin ó inus
Rai rahun lurón la hili maluk.
~..~

Wednesday, August 1, 2018

Knananuk Antiga Poezia Foun (espresaun poétika 144)

Knananuk Antiga Poezia Foun
 -.~.-
Hori tempu uluk labarik na’in-tolu, la’o rai

Despede inan aman ba buka be rai dook  

To’o iha dalan klaran, hateke ba kotuk

La’o de’it ho matan-been 
-

Iha fulan kotuk ha’u maun na’in-tolu, doko rai

Simu malus juramentu, hadulas rai laran

To’o iha dalan klaran ko’alia la  simu malu

Ses malu ho laran dodok

 -

Saida mak inan saida mak aman

Inan-aman ko’alia nu’udar bukae

Saida mak maun saida mak alin

Maun alin na’in tolu bukae laek.
- o -

Saturday, July 28, 2018

Matadalan Di’ak (espresaun poétika 143)

Matadalan Di’ak


-

Matadalan hatudu dalan ba alin

Rai badak ka as alin la’o rasik

La’o ho kuidadu bele to’o rohan

Labele sidi iha dalan klaran

-

Maun sira kuda hela ai fuan di’ak

Atu midar ka moruk alin koko rasik

Koko rasik tuir gostu tuir vontade

Kaer koko han koko tolan didi’ak.

-.-

Monday, July 23, 2018

Hamnasa Mak Ha'u Matawen Ne'ebé Subar (espresaun poétika 142)

Hamnasa Mak Ha'u Matawen Ne'ebé Subar

Hamnasa ha'u hamnasa
Haksolok ha'u hatudu
Oin-midar ha'u fó
Husik terus ha'u subar
~

Haksoit kontente ha'u haksoit
Knanuk furak ha'u hananu
Hamnasa beibeik la hatudu tristeza
Mataween monu subar-subar habokon fuan
Hafalun tristeza ho hamnasa
Tanis iha nonook mak ha'u subar
Husik moras mak hakoak ha'u
Tan hamnasa mak ha'u Mataween ne'ebé subar

 ~
Hakerek iha Dili, 20-07-2018 
Atór: Maya Amazhora F'Minoz
 ~
Nota: Poema ne’e la’ós ha’u mak kria maibé Atór (hakerek-na’in) mak Maya Amazhora F'Minoz, ha’u kópia mai iha-ne’e bazeia ba kompromisu/ autorizasaun entre ha’u ho atór.   
~..~


Wednesday, July 18, 2018

To’os Sei Badiin (espresaun poétika 141)


To’os Sei Badiin
~.~
To’os boot remata sei badiin
Atan oan  lere hotu hein be hein
Hein be hein maun sira atu kuda
Maun atu kuda karik, kuda fini moos
~..~
Fini moos fini di’an Atan oan hein
Kuda batar  remata Atan ba serbisu
Kuda hotu batar kuda mós aifariña
Aifariña nu’udar pão de Maubere.
~..~
.