Thursday, April 27, 2017

Espresaun poétika XCVII (97): Roman Lilin Páskoa




Roman lilin Páskoa

Roman lilin Páskoa nian leno ha’u matan, tilun no fuan
Leno ha’u matan hodi haree ha’u dalan, hetan ha’u domin
Leno ha’u tilun, rona Na’i futar-lian rona mós doben,
Leno ha’u fuan hodi hadomi tuir banati.
Hadomi doben, hadomi família/
Hadomi Na’i hadomi mós Pátria,
Ksolok santa Páskoa ba imi nobun!
 -oOo-
Nota: Poezia ne’e ha’u hakerek iha Sábadu Aleluia kalan, ha’u publika iha facebook maizumenus tuku 2 madrugada tama ba Domingu Resurreisaun nian.

Saturday, April 1, 2017

Espresaun poétika XCVI (96): Halibur Hamriik Hanoin Harii


Halibur Hamriik Hanoin Harii
.
Halibur hamutuk manu-knuuk ida
hamriik hamutuk ai liman ida
hanoin ida de’it laran ida de’it
hamutuk unidade la’o bá oin.

Monday, March 27, 2017

Espresaun poétika XCV: Rabeka Talin Kotu




Rabeka Talin Kotu
-
Fulan hira ona rabeka talin kotu
La ko’a tan knananuk furak
La hananu tan kantiga foun
-
Ó-nia domin talin kotu tutan sei susar
Rabeka talin kotu tutan sei bele
-

Tuesday, February 21, 2017

Espresain poétika XCIV: Hakarak hatene hakat liu bá



Hakarak hatene hakat liu bá
-
Merkadu Taibesi kór oioin
Modotahan, aifuan, na’an ho o.b
Iha tan buat seluk sura la kotu,
Hakarak hatene hakat liu bá.
-
Merkadu Lesidere lurón ninin,
Ikan fresku aifuan hateke Lita Store,
Karreta motór kór oioin,
Taka surat tahan mutin letra “for sale”.
-
Merkadu Jinján butuk Dili laran,
Tesi fuk, kumu isin, kumu tuir ritmu,
Sasán baratu folin un dolar,
Hakarak hatene hakat liu bá.
-
Hakat rasik ba hodi fihir ho matan,
Matan badaen hili rasik tuir gostu,
Hili tuir gostu tuir mós vontade.
-
(foto iha leten: Terminál Merkadu Taibesi).

Sunday, February 12, 2017

Espresaun poétika XCIII: Manu aman mean manu futu-fatin




Manu futu fatin
-
Manu aman di’ak ida sei mate let
Mate let tan futu la tuir fulun,
Lakon let tan tebe la tuir oras,

Ha’u-nia manu aman mean manu futu fatin
Sikat metan no mutin sikat mós kinur.
Ha’u kesi prepara hein nia biban
hafetu kokoreek, viva manu mean!

Ha’u-nia manu aman mean delun kle’uk nanis
Lain dada ba rai delun kle’uk nanis,
delun kle’uk nanis tan kesi kleur ona
hafetu kokoreek, viva manu mean!