Friday, October 10, 2008

Pasca '99 no molok ba 20 de Maio '02



Ha’u koko husik ha’u nia fuk, mas bainhira ha’u leno ba espellu ha’u haré ha’u nia oin hanesan lolós Kakuúk ida, dalabalu katar tanba kaspa nakonu...uh...entaun di'ak liu ha’u deside atu tesi tiha maibé hein to’o lós loron 19 fulan Maio tinan 2002 molok atu tama ba loron restaurasaun independensia nian.
Iha tempo Klandestina Timoroan liuliu Joven sira mak husik sira nia fuk…tara tersu iha kakórok…sikat tudik kro’at iha kanótak…no ida tan maka lori ho Biru atu hodi satan-an hosi kilat no sasán kro’at inimigu nian. Sira balu tara sira nia Biru iha kakórok balu hatáma deit ba isin, liu-hosi ko’a liman-kabun, ain-kabun, hirus-matan nst
.
Iha parte seluk joven balu hakarak hamétin Amizade liu-hosi KORAN (Maun-Koran ka Bin-Koran). Prosesu maka hanesan tuir mai ne’e: grupu ida ho membru mais ka menus na’in sanulu, ka ruanulu, sira deside tur hamutuk hodi hala’o juramentu ida hodi ko’a sira hotu nia limanfuan hodi hasai ran, haturuk ba kopu ida, kahur ho tua manas hamutuk ho estátua Na’in Feto nian ka Kruxifiksu. Sira tur tuir tinan, se maka tinan boot liu konsidera hanesan Maun-Boot ka Bin-Boot. Maun-Boot ka Bin-Boot tur uluk afoin tuir fali haré hosi tinan to’o ida ne’ebé tinan kiik liu ne’ebé sei konsidera nu’udar Alin-Ikun ka Alin-koran. Iha juramentu nia laran sira sei halo kompromisu ida atu haré no konsidera malu hanesan maun-alin to’o mate. Bainhira susar ruma afeta ba membru ida, membru hotu-hotu tenki ba fo tulun, no mós atu hodi rai metin segredu klandestina nian ba Bapa sira. Prosesu ne’e hala’o hosi tempo Indonesia ne’ebé ami toman tiha ona bolu “ Tempo Bapa”, to’o ohin loron. Ema Indonesia sira kostume bolu Bapak ba ema mane no Ibu ba ema feto, tan ne’e ami bolu “empo Bapa”, la’os “ tempo Ibu”.
Momentu estudante sira hala’o manifestasaun ba independensia, sira sa’e karreta truk bo-boot sira ne’e hodi hakilar: Viva Timor Leste! Mate ka Moris Duni Bapa Sai!, signifika atu mate ka moris tenki duni ema Indonesia sai hosi rai doben Timor atu bele ukun rasik-an.

Ho imájen ida ne'e ha'u hakarak aproveita mós oportunidade hodi hato'o ha'u nia ksolok Fin da Semana ba maluk sira iha nebé-nebé deit, ho esperansa atu maluk sira bele pasa Fin da Semana furak ida hamutuk ho família tomak.

===============================