Mai ita hotu hamutuk simu Tinan Foun
Ohin, loron 31 Dezembru 2008, Tinan Tuan nia Otas Tubik hela ona atu Haksumik’an hosi ita atu hodi troka fali ho Tinan Foun nian, tinan tuan nia rohan no nia ikun to'o ba ne'e.
Iha buat barak maka ita halo, maibé sei iha balu maka ita la konsege halo remata, no balu maka iha planu deit atu halo maibé la konsege halo iha tinan ida ne’e nia laran. Ida ne’e, ita rekoiñese nu’udar obstaklu moris nian, tanba knaar hirak ne’ebé ita halo no lahalo tuir ita nia kbiit no kapasidade limitadu nu’udar ema kriatura Maromak nian. Tan ne’e, ita sei simu tinan foun ho esperansa ida katak programa lubun ne’ebé la konsege halo remata iha tinan kotuk ita bele realiza iha 2009 nia laran. Ita sei loke tinan foun ho planu moris nian ne'ebé oioin... karik Natal tinan ne’e ita pasa iha Dili, tuir fali Natal tinan oin mai, ita balu sei ba pasa ho familia sira iha foho ka iha rai seluk, ka iha rai Betéin hodi hatene liutan situasaun rai nebá. Ida ne’e nu’udar mehi ida ne’ebé hakarak ka lae tenki mehi duni… tan ne'e, mai ita hotu simu hasoru tinan foun 2009 ho laran haksolok, laran mós no maus.-
