Iha Domingu (18 Janeiru), ha’u nia belun diak ida nia oan mane lakon iha tasi-ibun bainhira sira ba pasa fin da semana hodi hakail iha Plácio do Governo nia oin Hali-mahan nebá. Nia (matebian) naran Oko, ho kolega sira bolu malu ba hakail, família uma laran tomak lahatene, lokraik notísia mai katak Oko mout iha tasi, koitadu! Aluno Segundo Ano Pre-Secundário oan ne’e mate saguati tanba dezastre. Tuir mitos... iha tasi-ibun hosi parte Faról, Ponte-Kais, Palácio Governo oin, Hali mahan to'o Jardín Lecidere nia rohan mai, hirak ne'e nia na'in iha. Bainhira iha udan boot, tasi boot, anini boot, nia na'in la'o ba-mai hela, no bainhira ita ba harís ka hakail karik iha tempu ida ne'e ita bele hetan susar. Tan ne'e maka ita tenki koiudadu didi'ak, tanba ita ema moris iha mundu, bainhira atu moris ema sei hatene loron, maibé atu mate ema ida sei lahatene tanba planu Maromak nian hotu ne’ebé mistériu hela mai ita. Mate iha Domingu lorokraik, hakoi fali iha Segunda horisehik lorokraik mós. Ita nia destinu ita na'in lahatene.
