Ora-oras tan, Tinan Tuan 2013 fila kotuk ona no ita tenke
prontu simu fali Tinan Foun 2014 ho haksolok nakonu ho domin. Tinan ida-ne’e fó
buat barak mai ita, buat di’ak no at ita hotu hasoru ona no ita bele simu nu’udar
esperiénsia ida mai ita tomak.Pás no estabilidade la’o normál maske iha akontesimentu balun. Ema foin-sa’e
sira frustradu/a tanba problema domin nian to’o tara-an to’o mate iha ai-leten,
oho malu nu’udar rezultadu husi sira-nia xiumenta, mosu tan problema Kibata,
prizoneiru sira halai sai husi prizaun Bekora, no ikus liu istória domin husi Vise-Ministru
Solidaariedade Sosial JR nian ne’ebé ema barak toman liuhosi fotografia sira através
sítiu facebook nian iha inísiu fulan Dezembru. Talvés, isu ida-ne’e mak hodi
taka tinan tuan 2013 ninian.
Dezenvolvimentu ein-jerál dansa hela iha fatin, laiha progresu signifikativu ida. Estrada ku’ak
sira taka bosok de’it la kleur ku’ak fali ona hanesan ita hotu haree iha kapitál
Dili.Konstrusaun ba Ponte Komoro-2 la tuir nia planta ne’ebé ita haree katak sei
iha jardín iha sorin sira, nu fín la realiza, molik de’it hanesan baibain.
Ponte tuan ne’ebé Indonézia harii hela iha nia tempu okulasaun, tuir loloos atu
mantein hodi sai nu’udar evidénsia istórika hodi hatutan netin ba jerasaun foun,
tenke sobu no paradu hela, ezekusaun orsamentu husi Ministériu Obras Públika la
to’o 50%. Estrada husi distritu 12 ba sub-distritu sira piór
liután. Hosi parte saúde nian, ai-moruk ospitál referál Dili la
sufisiente, toba fatin pasiente la responde ho estandarte ida. Ai-moruk ba
ospitál seluk hanesan Baucau, Maubisi, Maliana Suai, etc., grave liután. Edukasaun, eskola balun
iha Dili to’o distritu mak seidauk iha nafatin banku ba alunus sira to’o
prezente data, alunus balun lori rasik kadeira husi uma, balun obrigadu tur iha rai durante
posesu aprendizajen, laiha merenda eskolár ne’ebé bele asegura ba sira-nia saúde.
Setór seluk hanesan agrikultura, tourizmu, satán pikuáriu sai piór liután. Diresaun
Nasionál Transporte Terrestre (DNTT) la fornese karta kondusaun ho apropridadu,
motorista barak mak oras-ne’e sei uza nafatin karta kondusaun provizóriu,
seidauk hetan orijinál tanba ho razaun tenke tuir lai workshop, seráke DNTT
bele estabelese workshop ba motorista ho númeru kuaze rihun-7 ne’e ka lae? Tansá
la kria to’ok mekanizmu ida eintermuzde entrega ona karta orijinál ba motorista
ne’ebé ba renova sira-nia karta provizóriu hodi fasilita sira na’in hira-hira
ba tuir workhop, bele ka lae no?
Ho ida-ne’e, ita espera katak tinan 2014 mai bele iha mudansa signifikativu ruma hodi
dudu rai doben ida-ne’e ba oin hanesan mós ho rai seluk. Espera mós katak
sei laiha tan membru Governu ne’ebé ho estilus bonitu sai nu’udar foto model ka
bintang iklan porno ruma iha facebook hodi estraga de’it nasaun Timor-Leste nia
naran. Mai ita hotu simu tinan foun 2014 ho haksolok. Dame ho fuan no laran
tomak, dame husi Kapitál to’o área rurál sira. Adeus 2013, Benvindu 2014!
