Roman Foun Tun Mai (espresaun poétika XCI)

Dikin okir tinan nian tubir sa’e ona

Roman foun tinan nian leno mai ona.

Tubir sa’e ho lalatak leno ha’u fuan

Roman foun leno mai leno ha’u dalan.

Leno ha’u dalan lori domin no dame

Tun hosi lalehan belar mundu tomak.

~::~

UDAN (espresaun poétika XC (90)

UDAN

Udan no anin kalohan falun metin

Situasaun obriga taka farumanas

Joven sira ho motór taka ho jaket

Ha'u falun metin ha'u doben, ho manta domin.

Terminal nakonu ho ema hein bemo

Sombriña funan-funan hakur estrada.

Bainhira udan boot, ema halerik...

Husu ba Na'i tansá mak sai nune'e

Bainhira bailoro naruk, duun kuku tau kero

Udan la fó tempu duun kuku kero fraku.

Udan no anin kalohan falun metin

Atu ba foho, transporte be laiha

Bolu maun sofér, telefone be mate

Bolu doben be la rona ha'u-nia lian

Hakarak hela hasoru malu

Telefone ba doben fora da área.
~o0o~

Mehi Funan-funan Mehi Amizade (espresaun Poétika LXXXIX)

Toba iha kalan mehi funan-funan

Hadeer mai si’ik fali kedas

Lamas lapizeira hakerek lalais

Sé mak hatene hetan sorte Lotaría
Amizade ka Rudal naran katak kona.

Hakerek Mamuk-neen Neen-walu (0668),

Sai tiha Mamuk-neen, Walu-neen (0686),

Hakfodak mai basa rentoos

Xateadu mai tolok rasik-an

Mulesti nia etun, pesti han ó…!

Tansá ha'u la fila bamai?

Molok hanoin liu tiha ona.

Nervozu an, arrepende mohu... 

Fó sala mehi, fó sala matebian

Tansá la tuur metin iha fatin?

Tansá tenke filafali bamai?

Molok hanoin liu tiha ona.

~o0o~
nota: foin update/atualiza fali ohin kalan 6-11-18/ tuku 11:58

Simu sorte At (espresaun poétika LXXXVIII)

Vinte sinku Outubru simu sorte at

Mai hosi Manatuto dadersán madrugada

Matandukur naresin - monu tiha rai naruk

Xoke ai-hun ida - ai fuan sin ida - ai sukaer. 

Iha Hera nia sorin - besik óleu-pezadu

Ema hotu sei toba - sei nakoron

Laiha testemuña - nein polísia.

Telefone  konkoñadu - bá hasoru ami

Dada netik maumean - tuba sa’e Fatu-ahi

Lori ba ofisina - mekániku Javanés Balide nian.

Belu eh belu, rona lai dadolin murak oan ne’e

Viajen ho karreta - sente matandukur karik

Para tiha ba ninin - hamate lai xave

Sadere uitoan - deskansa lai.

Neon Salak- Resan Entupidu (espresaun poétika LXXXVII)

 Neon Salak Resan Entupidu 

Sente hanesan hirus malu hela

Hamnasa ba malu oin sin tiha

Lia salak oan ruma mosu let karik…?

Lia anin oan ruma huu let karik…?

Lalatak baku mai si’ik sala tiha

Rona lian mosu mai hakfodak leet

Sente tur la metin telefone malu

Neon salak mosu netik resan entupidu.

Telefone ba malu ibun nakdedar

atu hakat ba malu laran la metin

Laran la metin sentimentu namlaik

Neon salak mosu netik resan entupidu.
~o0o~

·