Liafuan Tolok Nu’udar Temperu (e.p 122)

Lia tolok lia fo’er nu’udar temperu

Ko’alia uitoan tama netik tolok

Hakfodak kois mai, tama lia tolok

Haksesuk malu - at liu tan

Lia tolok namtate funan renda-renda

Funan renda-renda nu’udar temperu

Bandu la hetan la respeita malu

Habelar duka ba jerasaun foun.

Lia tolok lia fo’er nu’udar temperu

Temperu la furak estraga sentimentu

Hakilar malu ho liafuan tolok

Hirus malu ho liafuan tolok

Tolok malu hotu tiha hamnasa hikas

Haluha rai la sente sala

La sente an nein sente pekadu

Haburas duka nu’udar kultura.

Lia tolok sai mai, temi inan-aman

Inan-aman la sala, temi saugati

Lia tolok sai mai, temi isin lulik

Isin lulik inosente temi let loos...

Lia tolok lia fo’er sai toman at

Toman at be bandu tuir kultura

Kultura saudavel hadi’a hahalok

Hahalok edukadu buras ba kultura.

-)(-

Povu Dame Na’in (e.p 121)

Viva povu dame na’in

Ema dame na’in matenek no maduru

Matenek no maduru bele konfia

Konfia demais kongfú fali

Matan moris durante la'o Kampaña,

Mina gratuita nia bá enxe tiha.

Etu-falun gratuita nia bá han tiha,

Bee áqua gratuita nia bá hemu tiha.

Fatin la to’o nia sa’e ai-leten,

Hakilar fó viva doko ai tohar,

Iha loron votasaun nia tu seluk tiha

Aproveita gratuita tempu kampaña

Kamizola, Enxe mina, han estável
Hamutuk harame oras kampaña

Povu matenek konfia gratuita

Konfia demais kongfú fali
-...-

Matan Moris ho Polísia Check Point (e.p 120)

Kalan-kmanek maun Polísia Tránzitu

Matan dukur karik troka lai malu

Lalika obriga-an halo check point

Vista fraka karik uza tiha óklu

Labele lee sala ema nia naran

Kuidadu si'ik sala ema nia oin.  

~o0o~

Kuidadu Makikit (e.p 119)

Makikit subar-an fintas Lei na’in

Molok basa rentoos semo dok ona

Obriga emboot respeita Lei Inan

Ita ema hatene an, hakru’uk ba Lei

La hakru’uk ba Lei ita leki let

Na’okten tasi-balu sama ita-nia Lei

Makikit semo mai, bedok rai na’in

Molok ita hakfodak semo lakon ona.

~o0o~

Rai-nakdoko Bailoro nian (e.p 118)

Rai-nakdoko bainrua kalan

Anin huu maka’as oras liubá

Hakfodak hanta'uk laran taridu

Laiha dere besi, laiha tuda fatuk

Laiha hakfuik, laiha hakilar

Asu hatenu, seguransa metin

Kantadór oan sira la hananu tan

Lia-ten lia-na’in la le dadolin

Ha’u tur mesa-mesak kehe ha'u kosar

Se tilun hodi rona asu hatenu.

~o0o~

Matan Moris Neon Na’in (e.p 117)

Oan, ó boot daudaun ona

Prepara an hasoru dezafiu

Aman ha’u halai dala-tolu ona

Setenta-sete, noventa-nove, doizmil-seis

Oan, ó klosan daudaun ona

Haree prepara an

Prepara bukae,

Keta ses hosi ha’u sorin

Oan, halót o-nia sasán

Ita sei halai dala-ida tan

Ita la sa’e motór, la sa’e Prado

Ita sei halai ho ain tanan.

Oan ... 

Hakmatek ba, se tilun netik

Tuur matan moris tuur neon na’in

Tarutu lian karik ita sei halai.

~o0o~