Rai-nakdoko Bailoro nian (e.p 118)

Rai-nakdoko bainrua kalan

Anin huu maka’as oras liubá

Hakfodak hanta'uk laran taridu

Laiha dere besi, laiha tuda fatuk

Laiha hakfuik, laiha hakilar

Asu hatenu, seguransa metin

Kantadór oan sira la hananu tan

Lia-ten lia-na’in la le dadolin

Ha’u tur mesa-mesak kehe ha'u kosar

Se tilun hodi rona asu hatenu.

~o0o~

Matan Moris Neon Na’in (e.p 117)

Oan, ó boot daudaun ona

Prepara an hasoru dezafiu

Aman ha’u halai dala-tolu ona

Setenta-sete, noventa-nove, doizmil-seis

Oan, ó klosan daudaun ona

Haree prepara an

Prepara bukae,

Keta ses hosi ha’u sorin

Oan, halót o-nia sasán

Ita sei halai dala-ida tan

Ita la sa’e motór, la sa’e Prado

Ita sei halai ho ain tanan.

Oan ... 

Hakmatek ba, se tilun netik

Tuur matan moris tuur neon na’in

Tarutu lian karik ita sei halai.

~o0o~

Domin Laek (e.p 116)

Domin laek

Klamar laek

Laran metan

Kakutak fo’er

Mentalidade sobudór

Povu hakmatek ho laran susar

Povu hakmatek la’ós apoia imi.

*

(hakerek iha loron 19 de Outubru, ohin dadersan no publika kedas iha facebook)

Haree Rasik Ho Matan (e.p 115)

Vota ba Prado

Vota ho unanimidade

Vota ba Povu nia moris

Bloku Opozisaun Vota kontra

Sira lakohi atu povu moris di’ak!

Povu harohan hamaus Na’i Ulun sira

Fó liman ba malun hadomi ami povu

Na’i ulun tilun diuk Na’i ulun domin laek

Programa di'ak sira vota kontra.

**

(hakerek iha loron 19 de Outubru kalan no publika kedas iha facebook)

Lolo liman ba malu la’o bá oin (e.p 114)

Ó la husik ó-nia oan mai ho ha’u

Ó ema karaktén haree de’it ó-nia an

Ó lori ó-nian buka di’ak de’it.

Ha’u bolu sira atu mai hamutuk

Hakarak hakoak ema hotu-hotu

Lolo liman ba malu la’o bá oin.

-