FALINTIL Liman Kro’at Povu Nian (e.p146)

La‘ós lia anin - la’ós manu lian

Istória hakerek, kilat musan tarutu - funu nakfera

Loron Onze de Agostu, Hitunulu Resin-Lima

Hahú nakfera hosi UDT - tarutu nakfera hun UDT

Loron 9 nia laran - hahú oho malu ran nakfakar

Fatin Dadur Palapasu - testamuña ba istória.

Loron Vinte de Agostu - loron reasaun

FALINTIL hamriik - liman kro’at povu nian.

Hamriik alerta - fó resposta

Hamriik tarutu - viva Timor-Leste!

Loron ida ohin - wain ida ohin

Ha’u katak ba ó, kasu tutan ba sira.

Loron ida ohin - loron FALINTIL

Wain ida ohin - loron Istórika.

~..~

La Kabas Rahun La Borboleta (e.p 145)

Ó mai hosi oin, sama hetan nia

Nia hakfodak namkari, semo loro leten

Ha’u hasoru karik ó, sama kona nia

Nia hakfodak namkari, semo liután

Sira tuir ha’u kotuk, simu tutan nia

Sidi nia namkari, semo bá beibeik

Nia kor malahuk nu'udar manu falur

La kabas rahun be la la'os borboleta.

Nia mak rai rahun estrada foun

Bamai lorosa’e, liu Hera Metinaru sei simu nia
Bamai loromonu, hosi Tibar Tasi-tolu sei simu nia

Liu bá liu mai sei horon nia

Nia mak belun at lurón nian.

Nia mak rai-rahun estrada nian

Prepara ó-nia óklu, hatook ó maskra

Tau oklu ó matan, sulan metin ó inus

Rai rahun lurón la hili maluk.

~..~

Knananuk Antiga Poezia Foun (e.p 144)

Hori tempu uluk labarik na’in-tolu la’o rai

Despede inan aman bá buka rai dook

To’o iha dalan klaran, fila oin ba kotuk

La’o de’it ho matan-been. 

Iha fulan kotuk, ha’u-nia maun na’in-tolu doko rai

Simu malus juramentu, hadulas rai laran

To’o iha dalan klaran ko’alia la rona malu

Se kotuk ba malu ho laran dodok.

Saida mak inan saida mak aman

Inan-aman nia ko’alia nu’udar bukae

Saida mak maun saida mak alin

Maun alin na’in tolu bukae laek. 

~::~