Programa Lian Materna La Kontribui Efikázmente

Governu gasta de’it orsamentu ba profesór no materiál sira hodi hanorin lian materna, gasta de’it orsamentu hodi selu peritu ba lian materna hosi rai-li’ur hodi mai partilla sira-nia esperiénsia no vizaun ba lian materna, maibé lian materna iha Timor-Leste kompletamente laiha benefísiu ba estudante. Tanba Timor-Leste ho lian ofisiál 2, Portugéns no Tetun. Bainhira labarik ida ho idade nurak ne’ebé foin hakat atu estuda lian portugés maibé ita enxe netik ho lian materna mak dominante no la fó énfaze ka importánsia ba lian foun ne’ebé labarik atu aprende, signifika ita trava hela dezenvolvimentu labarik nian ba ita-nia língua ofisiál ne’ebé konsagradu iha Konstituisaun da Repúblika.    

Diálogu Partidu Polítiku iha TVE hori kalan, debate kona-ba “Programa Lian Materna”, iha pro-kontra mak barak, ha’u pesoalmente dezde inísiu ha’u kontra implementasaun Programa ne’e tanba tuir ha’u-nia haree, programa ida-ne’e nu’udar “Esforsu Kulit Mutin” nian hodi trava ka dezvia netik lian Portugés iha país joven ida-ne’e. Bainhira ita haree hikas ba istória edukasaun iha TL dezde era koloniál Portugés, ema povu oan sira sai hosi knua bá eskola, sira estuda direta lian portugés maibé introdusaun ho lian materna, klaru katak hanesan loloos “bibi-rusa tama vila”, maibé ida-ne’e mak sistema edukasaun ida atu hanorin “bibi-rusa” oan sira-ne’e sai “ema edukadu”. No realidade iha susesu duni, estudante balun mak akaba de’it “Kuarta Klase” aumenta tan bá kumpri instrusaun militár durante tinan 3, balun lae maibé sira konsege koalia portugés ho di’ak. Karik iha altura ne’ebá mak Governu Koloniál Portugés aplika kedas lian materna, ha’u fiar katak estudante barak mak sai bibi hotu. Tanba-ne’e, dala idatán ha’u hakarak deklara katak ha’u pesoál rezeita implementasaun lian materna. Tanba, karik ita kontinua haburas programa ne’e, signifika ita kontribui hodi trava netik sistema edukasaun iha TL espesialmente ba lian portugés. Ita la sente, mas esforsu ida-ne’e mai hosi ema balun ne’ebé lakohi timoroan atu iha koñesi mentu profundu ba lian portugés. Ema balun ne’ebé tenta atu halakon língua portugés iha Timor-Leste. _