Ha’u loke fali album foto uluk nian
Loke bá mai, buka tun sa’e,
hetan duni balu.
Foto kleur ona, belit malu tan tiha
Balu kmeak ona, tanba kleur la loke.
Fihir neineik hodi hanoin biban ne’ebá
Balun hasai ho kolega,
balun ho doben.
Balun sei moris,
balun laiha ona iha mundu ne'e... koitadu!
Iha komik maibé iha triste,
bainhira haree no hanoin hikas.
Ita-nia retratu uluk hasai iha tasi ibun,
la moos ona.
Balu malahuk balu kulafur tan,
maibé haluha mak lae.
Haree ba, komik halo ha’u
hamnasa mes-mesak.
Biar malahuk ba,
nu’udar rekordasaun ha’u rai nafatin.
--- o0o ---
