Hein Mak Hein (e.p 166)

Maun Tomás halo-an haree la sente

Mau Peu halerik husu hela tulun

Husu hela tulun tuir maun promete

Promete hotu tiha haluha lakon.

~

Maun Tomás hatene daudaun finji la haree

Goveia ain moras la’o labele

La’o labele tanba ain uat sin

Kontente hosi li’ur subar hela moras.

~

Iha Basar laran maun Tomás doko rai

Maun Felis Regadór lakohi lakon

Knaar rihun-neenulu nu’udar promesa

Promesa hotu tiha la hatudu tuir.

~

Maun Tomás, maun Felis, hanoin tetu lai

Goveia nia moras rai-dook temi

Maun Xiku la’o ketak la liga rai

Mau Peu kbiit laek hein mak hein.
~

Ó keta dehan: ha’u soe lia

Ó keta katak: ha’u bobar lia

Ó ibun beek, ó kabeen boot
Ó lohiteen be, ó domin laek!

~::~

Loron Nakfilak ba Kalan (e.p 165)

Hosi nabilan loromatan ikus

Hakat ba kalan ho roman fulan nian

Leten as sei nakonu ho nabilan fitun mai

Anin hu hakmatek rai mós sei badín.

 ~

Lahatene loos iha-ne’ebé mak ha’u haluha mehi sira

Ha’u loke hikas album foto tuan

Ba domin ksolok be karik ha’u iha

Biban furak sira be karik lakon let.

 ~

Hosi dapur, ha’u horon kafé suhan morin hosi oan feto

Ha’u tuur lolo ain iha varanda oin

Rona mós viola lian hosi viziñu sorin

Simu ha’u-nia kafé timis mesmesak.

~::~

Malirin (e.p 164)

MALIRIN
-
Tempu anin malirin iha rai-manas

Malirin hanesan fali, rai-malirin

Malirin hosi loron to’o tiha kalan

Malirin hosi kalan to’o tiha dadér

Ibun kulit maran isin lolon kaskadu

Reboka handbody hodi hamamar

-

Tinan ida-ne’e lahanesan tinan kotuk

Dadeersan kaer bee, isin tata’uk

Lokraik atu hariis, isin tata’uk
Babeur ita atu lalika hariis

Obriga ita atu hatais farumanas

Malirin tinan ne’e han tempu naruk.

-::-::-::-

Hanoin-Hikas Setembru Negru Noventa Nove, Tinan 20 Liubá

Mota Laran Lu-Amut - Kairui, Manatuto 11 de Setembro 1999

~

Hanoin-hikas situasaun Setembru Negru noventa-nove, altura ne’ebá ha’u serbisu ho UNAMET, bainhira ONU anunsía Rezultadu Votasaun iha 4 de Setembru 99, no Staff Internasionál sira tenke sai hosi Manatuto husik hela ami, entaun iha 6 Setembru, ha’u evakua ho joven na’in 2: primu Manaduk ho kolega Filipe de Carvalho (ho naran estimadu:Ibik) bá natar ninin Kuruk-Lidun Manatuto nian. Ami lubun ida mak toba iha ne’ebá hamutuk ho profesora Madalena ho nia oan sira, belun Armada (Geraldo Gomes), belun Carlito Pinto ho nia kaben, nst.  Tuirmai kronolojía evakuasaun: 

·         6-9-99:      Evakua hosi vila bá toba iha natar ninin Kuruk-Lidun área Aiteas nian.

·         7-9-99:      Sa’e foho bá Wegaba (sei iha área Aiteas). Ami akampa iha mota ninin, foho lolon sira, no informasaun hosi ema rai-na’in katak “labele hariis ho sabaun, se lae mota bele maran tiha tanba rai ne’e lulik”, labarik joven sira sente estrañu uitoan no ladún fiar, entaun liu de’it loron 5 mota mós maran. Ami tenke buka fatin seluk ne’ebé iha bee.

·         11-9-99:      Dadersán, Ha’u bá buka aihán iha Kairui tuir señór Simião Latiboe no tiu ida ho naran koñesidu Asala, hosi nia dialetu ha’u identifika nia ema Laleia, portantu sira na’in-rua mesak ema Laleia oan. Ami tama Kairui oras lokraik ona, ha’u tama kolega Duarte (naran kódigu: Rame [agora membru PNTL]) nia uma, susubeen kopu boot ida nia prepara hela ba nia-an hatuur hela iha meziña ida leten, ha’u tama bá... ha'u hemu hotu tiha la fó tan obrigadu. Ha’u ho irmaun Duarte Rame koñese no toman malu kedas durante tempu rezisténsia. Ho susubeen ne'e ha'u sente bele bosu netik uitoan. Populasaun Kairui evakua sai hotu bá ailaran, kios ida mós laiha, ami tenke fila-fali ho liman mamuk bá Wegaba. Tuir dalan, ha’u konsege hetan tan kolega na’in tolu, no ami hasai lai foto. Sira kontinua evakua nafatin, entaun ami tenke fahe malu.  Ami na’in-3 (hau, Latiboe, Asala) sa’e nafatin mota to’o hetan fali irmaun João Timóteo ho nia família rai hahú nakukun dadauk ona. Iha-ne’e ami sente di’ak fali ona, ami toba lai iha-ne’ebá iha mota ninin ai-kakeu laran, Lu-amut nian.  

·         12-9-99:      Dadersán de’it ami fila-hikas mai Wegaba. Tuir dalan ha’u hakfodak tanba hetan fali sobriñu Maunó Guntur, sira  mós foin bá hosi Dili. Sira kontinua bá Waimory no ami tenke sa’e fali foho boot ida ne’ebé hori sehik ami liu ne'e hodi tuun fali mai ami-nia akampamentu Wegaba.      

·         13-9-99:      Ami muda fatin bá fali mota ulun ho naran Akampamentu Mata-Ahuk, tanba bee mota Wegaba nian maran ona.

·         16-9-99:      Komandu Falintil delaga maun Domingos Apai matebian ho Regu Armadu ida bá fó orden atu refujiadu ne’ebé akampa iha foho lolon sira tenke tun bá konsentra iha Kairui hodi bele asesu ba Aihán ne’ebé aviaun hatuun mai refujiadu sira. Ami liu fali hosi Lu-Amut bá akampa iha mota ninin/ natar laran Tabakurón. Durante ami akampa iha Tabakurón aviaun konsege hatuun aihán kuaze dala-3 de’it, ne’e mós hadau malu mate mak bele hetan uitoan. INTERFET tama iha Dili ami iha Ailaran.

·         24-9-99:       Ha’u ho joven na’in-10 bá Komandu Falintil iha Waimory hodi husu ajuda netik aihán ruma. Joven sira-ne'ebé ha'u sei hanoin sira-nia naran mak hanesan: Aboik (PNTL), Filipe de Carvalho, Abis - Edes - Malaku - Ivan, sra-na'in-4 mesak maun-alin, tama tan Ajó (tiu Joaquim eis Xefe Suku Primeira) nia oan mane, Asara, nst., inklui tiu Amutin matebian ho nia oan mane Nelio no oan mane ikun Aninu. Komandante Falur Rate Laek mak simu ha’u ho grupu,  no komandante Falur fó orden ba adjuntu Tiger Kablaki hodi arranja fos saku tolu mai ami, ha'u hetan fali sobriñu Maunó Guntur iha ne'ebá, ha'u buka fali irmaun Arca atu husu netik tabaku ruma, seidauk hetan malu, rona sira bolu ha'u-nia naran entaun ami aproveita kedas truk vaskolante ida atu bá Kairui tula hela ami-nia fos.

·         1-10-99:      Ami komesa tama fali ona, maibé ami sei refujía iha Kairui laran iha irmaun Tomé /eis-profesór ida nia uma, oras-ne’e irmaun Tomé muda fali nia profisaun no servii fali nu’udar PNTL.

·         7-10-99:      Ami bele tama hikas ona mai Manatuto mai haree fali Manatuto nia oin foun ne’ebé nakonu ho lalar-asu, nakonu ho ahi suar no latun nakonu ho tristeza no matabeen. Bele imajina, ita to’o iha igreja Manatuto, ita bele hateke hetan loja Uma Fatuk ho distánsia kuaze metru atus-4 nian ne’ebé antes ne’e haree la borus, maibé  tan de’it Milísia Mahadomi sira sunu, Manatuto laran sai tetuk tiha hanesan kampu. Ita haree fali ona lona azúl hosi asisténsia umanitáriu UNHCR nian mak dada iha bairru laran. Biar Triste maibé Haksolok mós tanba bele hasoru fali família ne’ebé namkari lemo-lemo tan de’it atitude Milísia Asasíniu sira. Ami bá toba iha Hiban Rasa, to’os tia Adai sira-nian, tia Adai ho tiu Mutin matebian ne’ebé uluk ha’u hela ho sira iha Taibesi durante SMA tinan tolu nia laran, ami mak halai hamutuk no fila mai mós hamutuk nafatin.

·         8-10-99:     Maizumenus iha dadersán tuku 8, ha'u tenke despede hela sira iha Hiban Rasa no ha'u tenke sai ba hein karreta hosi lorosa’e mai fali Dili. Ha’u tuun iha Merkadu Lama, atuál CCD (Centro Convensão Dili).  Ha’u hakat bá lai prima Izu sira iha Audian, la kleur tia Binda nia mane-foun, prima Rosa Sarmento (Aroza) nia la’en tama bá ho motorizada Honda Win ida bá buka primu Anízio, entaun ha’u empresta lai nia motorizada bá haree to’ok uma iha Becora. Laran moras no hakfodak tanba uma la hetan sunu maibé Milísia Kedua lelaun moos sasán uma laran. Sobriñu Maunó Guntur to’o uluk ona iha Dili, nia hakerek hela iha janaela hun parte uma kotuk: “Biar Hangus Asal Merdeka” signifika “Biar Motuk, Naran Ukun-an”.

·         9-10-99:      Ha’u bá aprezenta-an fali iha eskritóriu UNAMET Balide atu loke fali pájina foun nian ba Ukun Rasik-an. Setembro Negro atu metan ka mutin ita liu ona, midar ka moruk ita koko ona. Akontesimentu pasadu halót ona ba istória, ita hein fali futuru nian ne'ebé bele nabilan ba povu tomak no futuru jerasaun rai doben ida-ne'e nian.

~::~

Moruk Noventa Nove (II)_(e.p 163)

Rezultadu Votasaun Referendum nian

Loron ohin tama tinan-24

Hanoin hikas ba oras rezultadu

Oras rezultadu ba prosesu foun.

~

Ita ne’ebé manán, halai bá foho

Sira ne’ebé lakon, halai bá Atambua

Halai bá foho hodi buka moris

Bá Atambua mós hodi buka moris.

~

Biar Milísia sunu motuk ami uma fatin

Biar Motuk ka Ut ita Ukun-an

Ukun-an dala-ida - metin bá oin

Ukun-an dala-ida - ukun ba beibeik.

~

Sira bá  Atambua, halai ho Ta’uk

Ho Moe ho Susar halai bá nafatin

Halai bá nafatin tuir orientasaun!

Ulun boot Autonomista lohi let povu sira.

~

Ahi-suar no latun - fahe grupu rua

Autonomista Independentista - se kotuk ba malu

Bainhira udan solur - motuk no ahi-latun

Governu Planeia harii CAVR.

~

CAVR moris mai - hodi fasilita

Simu-malu, Lia-loos, Rekonsiliasaun

Hatudu ba Mundu Timoroan Hadomi Dame

Haklaken ba Mundu Timoroan Dame Na’in.

~::~

Moruk Noventa Nove (I)_ (e.p 162)

Istória moruk noventa nove

Milísia kontrola molok Referendum

Tiru kilat tarutu hata’uk povu

Ameasa povu TENKE hili Autonomía.

 Milísia ameasa tiru kintu kantu

BRTT akompaña lansa propaganda

Propaganda si’ak, povu fuan ki’i

Fuan ki’i, tan rona lian ameasa

La hakmatek, tan rona kilat tarutu.

 Suara Timor-Timur loke nia pájina

Chico Lopez alerta ba Timoroan

Otonomi menang darah menetes

Merdeka menang darah mengalir.

 Timoroan fuan toos la ta’uk mate

Iha loron votasaun vota ho kalma

Konfia ho kalma no konxiénsia

Timoroan hamutuk bá ukun-an.

 Iha Kuatru de Setembru Noventa Nove

Anúnsiu rezultadu hosi Kofi Anan

Rona rezultadu, hakoak malu ho matabeen

Matabeen haksolok bá ukun-an.

 Autonomista oan sira sente Moe Boot

Hamutuk ho milísia, sunu sidade laran

Hamutuk ho milísia oho maun-alin

La importa fetosán ka umane.

Haloot sasán halai Mota-ain

Husik hela ahi-suar no ahi-latun. 

Husik lerek matabeen no lunturu

Soe lerek knua doben ba rai seluk

Bá moris rai seluk nu'udar La'orai

Bá hela knua foun nu'udar Bainaka.

~::~

Funu Hotu Tiha Dame Tuir Lei (e.p. 161)

 Funu hotu tiha fila ba dame

Kaer liman hamutuk tama ba dame

Kilat tutun fila malu, fila-hikas ona

Hadomi hikas malu moris ho dame.

-

Iha dame nia laran moris funu foun

Funu ba serbisu ba progresu

Hadau podér entre maun alin

Hamoris korrupsaun entre maun boot.

-

Funu ba progresu la’o nafatin

Funu buka lia-loos la’o nafatin

Ema ki’ik iha kraik husu unidade

Emboot iha leten la’o sees malu.

-

Iha dame laran, mosu babeur foun

Inan feton knuuk-foun soe kosok-oan

Tribunal kaer lei, kaer la justu

Tetu Lei la tuir Dasin lei nian.
-

Dasin Lei nian nu'u Dasin Osamean

Tetu Lia tuir Dasin Lei Osamean.

~::~

Povu Ki'ik Mate Saugati (e.p 160)

Povu Ki’ik Mate Saugati

-

Na’i, rai nakdoko!

Nakdoko ba povu ki’ik

Nakdoko ba kbiit laek

Hata’uk hatodan povu la hakmatek

La hakmatek tanba simu novidade at

 -

Na’i, runguranga iha fatin fatin

Nakdoko kintu-kantu hata’uk malu

Hakilar la’ós haksolok

Hakilar tanba hakfodak

Hakfodak tanba ta’uk

 -

Na’i, rai nakdoko!

Oho malu nu’udar balada fuik

Hosi kapitál to’o aldeia

Hosi lorosa’e to’o loromonu

Oho malu ida-ne’e hun la tada

 -

Na’i, tansá na’i-ulun la tau-matan

Na’i-ulun kbiit na’in la book-an

Kaer lei ho orden kaer saugati

Povu ki’ik oho malu mate saugati

Mate saugati tan domin namlaik.

-::-

Kuidadu Keta Bok Nia (e.p 159)

;

Kuidadu Keta Bok Nia
-

Bá lorosa’e sei hetan nia

Molok tama Obrato  área Manatuto

Maun ida latan-an habai loro

Kolan oan  tasi-ibun estrada ninin

-

Iha raihenek leten la hatais kuekas

La bobar hakfolik nein kesi ulun

Nia la si’ak la’ós matandukur

Kuidadu keta besik, keta bok nia.

~::~

111

Baibain De'it (e.p 158)

Babain De'it

Hori kalan ha'u hasoru ó iha ha'u-nia mehi
Mehi furak naresin lahanesan baibain
Ohin dadeer hetan kois lalatak hosi ha'u-nia óklu

Óklu metan kmo'ok be ha'u taka baibain

Kalohan nu'u kabasrahun bobar netik ha'u-nia oin

Kabasrahun semo tuir anin hanesan baibain.

Hosi kotuk rona kois lian ida bolu ha'u-nia naran

Naran estimadu nu'udar baibain

Ha'u fila kotuk hateke rai mamuk

Rai mamuk rai luan hanesan baibain

Moris iha mundu baibain lerek

Lalika foti an, tan loron ikus Na'i mak sei foti.

~o0o~

Rekadu Kakatua (e.p. 157)

Rekadu Kakatua 

Kakatua kakatua manu kakatua

Kakatua lain mutin manu kakatua

Manu kakatua lian iha auhún

Lian bolu nia oan rona sentidu

Manu kakatua lian fila oin mai

Se kotuk auhún kasu rekadu

Fila karik bá knua semo kuidadu

Semo ho hakmatek ho kuidadu.

~o0o~

Husu Fuan Midar (e.p 156)

Hori sehik loromanas, lia anin huu mai morin naresin

Ohin kalan nakukun, badín la rona rai

Manu-aman basa liras kokorék se tilun mai

Se tilun ba mundu, kasu netik lia ruma mai rai ne’e

Rai ne’e ó-nian, ha’u-nian, ita hotu nian

Ita hotu sei tane sei bali nia

Bali nia ho domin ho fuan midar

Tane nia ho domin ho fuan mutin. 

~o0o~

Dalan Ita-Nian (e.p 155)

Dalan Ita-Nian

-

Husi tinan ba tinan, ita ema nia oin sei muda-an.

Idade aumenta, namkurut sei mai kaer aitonka.

Fuk-mutin fuk-molik, nehan tohik sei la ses.

Estilus labarik sei mosu hikas,

Mosu hikas mai karik, kateter suli tun, popok lori todan.

😄😄🎻😄

Ha’u Hakarak Tan Dala-Ida (e.p 154)

Perdua malu iha loron ida ohin

Wain ida ohin la loron leet, loron korezma

Halo sala buatruma perdua tiha

Katak sala lia ruma hamoos tiha

Ha’u hakarak tan, udan boot tun mai

Manu falur mutin hariis udan

Semo tun valeta nani ho lixu

Hisik liras maran tiha, semo loro leten

Semo bá loro leten fihir tun rai

Matan ikun ba sentru hamoos lai sira

Liman badaen no liman malandru,

Hahalok fo’er no kakutak na’okten…

Ha’u hakarak tan dala-ida!

-o0o-