Katuas Klosan (e.p 101)

Klosan sira ohin loron oin seluk liu

Sui fuk sai panker patarata mohu

Oklu metan taka metin la liga rai

Liman sorin ba bolsu sorin ba sigaru

-

Katuas fuk mutin lakohi lakon

Fuk mutin pinta metan konfia lerek

Ibu-rahun sai mutin koi moos tiha

Hakarak filafali ba tempu klosan.
-
(Oh hele le... oh helela... ita ema sei moris halo rai nia naran...)

-.-

Falun no Tane (espresaun poétika C [100])

“Falun no Tane”

 (espresaun poétika [e.p] ba dala-100)

Nu’udar lensu, hamaran ó kosar

Nu’udar lensu, falun metin murak-rai

Falun no tane tinan ba tinan

Hamriik metin iha fatin as

Hateke tun ba ó emar sira

Emar ó-nian be hein ó tulun
Emar ó-nian be hamlaha no hamrok!

~o0o~

Sasin ba Istória (espresaun poétika XCIX (99)

                                                                                

Sasin ba Istória

Xavier do Amaral ulun boot Timor nian,

ulun boot no abut ba ukun-an.

-

Proklamadór unilaterál iha situasaun apertadu,

inimigu kaptura hadadur tinan ruanulu.

-

Tama dadur tan defende ukun rasik-an,

tama dadur tan hakribi kolonializmu.

-

Ukun-an la hetan hosi prezente,

ukun-an liuhosi ran no ruin.

-

Ran no ruin namkari Timor laran,

Ran no ruin testemuña ba istória.

-.-

Nota: Estátua lider istóriku Francisco Xavier do Amaral (primeiru prezidente Fretilin no Primeiru Prezidente RDTL nomeadu hosi CCF) ne’ebé koñesidu nu’udar Avó Xavi, hamriik metin ona iha rotunda CCD nian, tuir programa atu inaugura iha loron 19 de Maiu 2017 ohin.

Matak Malirin (espresaun poétika XCVIII)

 

Matak Malirin

Kahoris kain mean tahan kor matak,
Abut nani rai okos besik bee-matan.

 
Bee matan malirin kuda kahoris,
Kahoris fo matak fo malirin.

 ~o0o~