(i)
Ita ema sei mate, loron no oras marka tiha ona
Iha mundu ita hotu nu'udar bainaka
Iha mundu ita hotu ema la'orai
Bainhira Na'i bolu, sei la halo tenik tan buat ida
Sei la lori kohe-mama, tabaku eh bua malus.
(ii)
Bainhira ha'u mate, lalika tau kaixaun karun
Lalika hatais roupa furak, hodi latan iha rai okos
Kaixaun karun, roupa furak, sei nakfilak sai rai metan
Aifunan masa aifunan freska, sei nabeen namlaik iha rate leten
Ema nian sosa karun, ha'u-nian baratu lerek tuir ita kbiit.
(iii)
Lalika sunu lilin boot, satán lampu kristál iha rate leten
Interese liu mak orasaun akompaña ha'u-nia klamar
Orasaun badak de'it, lalika naruk no funan-funan
Ha'u rasik sei hatán iha Na'i futar oin
Iha Reinu Lalehan, Reinu Glória Bendita nian.
(iv)
Tempu finadu, lalika lori aifunan oioin bá vizita ha'u
Lalika reza ho intensaun, atu tulun ha'u-nia klamar
Na'i mak fó moris mai ha'u, ha'u klamar sei halo rasik
Família sei se matebian ho aihán, na’an no tua
Hasa’e orasaun, han hemu temi ami naran.
(v)
Lalika hafutar ho koroa kmo’ok
Bahat lerek letra "Aqui Jaz "iha ha'u kruz
Parente balun le karik ha'u makne’e,
Nu'udar matebian ha'u la le ona
La le, la haree imi-nia vizita.
(vi)
Sé mak hakarak fó onra, prezente ho aifunan morin
Haruka kedas bainhira ha'u sei moris,
Bainhira ha'u mate sei la sente, la horon ona
La haree saida be imi halo
La rona saida be imi katak.
(vii)
Lalika bá vizita ha'u-nia rate,
Iha rate nia klaran sei la hetan malu
Bainhira sei moris vizita kedas malu
Vizita malu hodi dada lia uitoan
Dada lia hamutuk konta istória.
(viii)
Bainhira hasoru malu, ita sei haksolok
Ita bele hateke malu, oin-ho-oin
Kaer liman hamutuk, hodi ko’alia
Lok netik tabaku ho bua malus
Hemu netik kafé tanan, ita-nian nanis.
~::~
