Hakarak Hatene Hakat Liu Bá (espresain poétika XCIV)

Hakarak Hatene Hakat Liu Bá

-

Merkadu Taibesi kór oioin

Modotahan, aifuan, na’an ho
obé

Iha tan buat seluk sura la kotu

Hakarak hatene hakat liu bá.

Merkadu Lesidere estrada ninin

Ikan fresku aifuan hateke Lita Store.

Karreta motór kór oioin

Taka surat tahan mutin letra “for sale”.

Merkadu Jinján butuk Dili laran

Tesi fuk, kumu isin, kumu tuir ritmu.

Sasán baratu folin un dolar

Hakarak hatene hakat liu bá.

Hakat rasik ba hodi fihir ho matan

Matan badaen hili rasik tuir gostu

Hili rasik tuir gostu tuir vontade.

-

(foto iha leten: Terminál Merkadu Taibesi).

Manu Futu-fatin (espresaun poétika XCIII)

Manu futu fatin

Manu aman di’ak ida sei mate let
Mate let tan futu la tuir fulun
Lakon let tan tebe la tuir oras.

Ha’u-nia manu aman mean, manu futu fatin

Sikat metan no mutin sikat mós kinur.
Ha’u kesi prepara hein nia biban
hafetu kokoreek, viva manu mean!

Ha’u-nia manu aman mean delun kle’uk nanis

Lain dada ba rai delun kle’uk nanis

delun kle’uk nanis tan kesi kleur ona

hafetu kokoreek, viva manu mean!
~o0o~

Ne’e mak PES (espresaun poétika XCII)

Ne'e mak PES

Malae ho As bolu Mintíg

Forma kór ida de’it bolu Minlí

Tahan sia kompletu dehan kerás

Hili tan makaku tama ra’ut taxu!  

~o0o~

Roman Foun Tun Mai (espresaun poétika XCI)

Dikin okir tinan nian tubir sa’e ona

Roman foun tinan nian leno mai ona.

Tubir sa’e ho lalatak leno ha’u fuan

Roman foun leno mai leno ha’u dalan.

Leno ha’u dalan lori domin no dame

Tun hosi lalehan belar mundu tomak.

~::~

UDAN (espresaun poétika XC (90)

UDAN

Udan boot no anin kalohan falun metin

Situasaun obriga taka farumanas

Joven sira ho motór taka jaket metin

Ha'u sei falun doben, ho manta domin nian.

Terminal nakonu ho ema hein bemo

Sombriña funan-funan hakur estrada.

-

Bainhira udan boot, ema halerik...

Husu ba Na'i tansá mak sai nune'e

Bainhira bailoro naruk, dun kuku tau kero

Udan la fó tempu dun kuku kero fraku.

Udan boot no anin kalohan falun metin

Atu ba foho, transporte be laek

Bolu maun sofér, telefone be mate

Bolu doben maibé la rona ha'u lian

Hakarak hasoru maske udan boot

Telefone ba doben fora da área.
~o0o~

Mehi Funan-funan Mehi Amizade (espresaun Poétika LXXXIX)

Toba iha kalan mehi funan-funan

Hadeer mai si’ik fali kedas

Lamas lapizeira hakerek lalais

Sé mak hatene hetan sorte Lotaría
Amizade ka Rudal naran katak kona.

Hakerek Mamuk-neen Neen-walu (0668),

Sai tiha Mamuk-neen, Walu-neen (0686),

Hakfodak mai basa rentoos

Xateadu mai tolok rasik-an

Mulesti nia etun, pesti han ó…!

Tansá ha'u la fila bamai?

Molok hanoin liu tiha ona.

Nervozu an, arrepende mohu... 

Fó sala mehi, fó sala matebian

Tansá la tuur metin iha fatin?

Tansá tenke filafali bamai?

Molok hanoin liu tiha ona.

~o0o~
nota: foin update/atualiza fali ohin kalan 6-11-18/ tuku 11:58