Tau Matan Ba Ema Ki'ik [e.p 266]

Ema ki'ik hili imi, ho laran metin

Hili ho laran metin, no fuan buras

Imi atu tau matan ba ema ki'ik

Hodi hanoin didi'ak tetu didi'ak.

Lia ruma latuir malu, koalia ho mamar 

Hamamar liafuan tane metin dame 

Lalika sadik malu, keta sukit tan

Haksesuk malu ba, hanoin mós ema ki'ik

Basá ema ki'ik hili imi 

Hili duni ho fuan buras.

--- o0o ---

Bidón Osamean [e.p 265]

Bidón osamean hamriik lerek

Hein lerek liamenon tinan kotuk nian

Bidón osamean laran mamuk lerek

Lahatene loos atu simu hosi nbé

Hosi bee-matan ka hosi kadoras

Bidón osamean laran mamuk lerek.

--- o0o --- 

Oras Despedida Udan Tinan ba Loro-bubur [e.p 264]

Tarutu hosi kakuluk, 

bee lian lapara turu tun rai leten

ohin lokraik.

Hateke  hosi janela 

udan boot kalohan falun

rai kai badín. 

Sinál mai ita Udan Tinan atu hotu

Tama fali ba iha oras Loro-bubur.

Ha'u hakarak udan para ho hakmatek, 

Bee suli ho domin la harahun ambiente

Ha'u hakarak haree fali manu-rade mutin

Nani tama bee-lihun laran

Hamoos fo'er sukit sai kakas 

Ses hosi kanko laran Kaikoli nian.

--- o0o ---