Ha’u Hakarak Tan Dala-Ida (e.p 154)

Perdua malu ona iha wain ida ne'e

Hadame malu ona iha biban ida-ne'e

Halo sala buatruma perdua malu tiha

Katak sala liafuan ruma perdua tiha

Ha’u hakarak tan udan boot tun mai

Manu falur mutin hariis udan

Semo tun valeta nani ho lixu

Hisik liras maran tiha, semo loro leten

Semo bá loro leten fihir tun rai

Matan ikun ba sentru hamoos lai sira

Liman badaen no liman malandru,

Hahalok fo’er no kakutak na’okten…

Ha’u hakarak tan dala-ida!

-o0o-

Produtu Lokál Ha'u-nia Knua (e.p. 153)

Produtu Lokál Ha'u-nia Knua

Aifarina fehuk-midar  tama ho talas

Goiabas abakat derok sabraka

Kabura, agriaun, ortalán, lekirauk-ikun

Markujás tahan, lakeru dikin

Tua mutin tua sabu, banibeen puru

Reprezenta produtu lokál knua ha'u-nian

Negosiante kapitál mai kada semana

Hadau malu ba produtu lokál nian

Kadeira rota hosi suku Orlalan

Tua sabu saboritu suku Manelima

Bis ho angguna movimentu loron-loron

Hanesan hela  atividade kapitál

Rai ida malirin ha'u moris fatin

Kalohan matan udan tuir tempu

Iha tempu udan kalohan falun

Tempu bailoro anin hu sasiri, siri kokotere

Ne'e mak ambiente matak be klima saudavel

Nonoi ye Nonó we, mai ita filafali bá ita knua!
Ankay ye Kalow we mai ita filafali bá ita knua!

-o0o-

Hanoin Lahetan (e.p. 152)

Hanoin Lahetan

Buatruma sala so’in dehan sai tiha

Hasoru malu oin buis de’it

La hasee malu la katak buat ida

Se kotuk ba malu la’o daudaun.

Buatruma sala so’in katak ba malu

Oin buis de’it ho razaun la klaru

Biban ida-ne’e lahanesan babain

Kompriende mós ho ema fulan lotuk.

~o0o~

Mensajen ba Alin (e.p.151)

Mensajen ba Alin

Alin, tansá la hakmatek

Tansá la hadomi malu, hanesan ó hadomi ó an rasik

Ha’u katak ba ó, dehan tutan ba nia

Di’ak-liu hakmatek mantein páz

Latan tiha ó-nia RAMA hakmatek ó fatin

Aprende hadomi iha komunidade

Ó HANA ema ida, ó halakon nia vida, ó kontente

Polísia kaer toman, sulan tama komarka ó leki-leet

Família hakfodak, laran susar ba ó, moe ba viziñu

Família matebian, matabeen todan

Ó oho ema ida ho besi kro’at

Loron seluk ó mós sei mate ho besi meik.

Alin, ha’u husu ba ó, ha’u katak ba ó

Di’ak-liu latan tiha ó-nia RAMA
Ita rua hamutuk, tama tan ho nia, foti ita rain

Ita rua maun alin rai ida de’it

Iha Rai Lafaek Ran Timór.

~o0o~

Kalma no Hakma (e.p 150)

Kalma no Hakma

Kalma ho ulun malirin

Nonook  la’ós ta’uk

Nonook la’ós lakon

Nonook bele bá  Oin

Nonook dalan bá Dame.

Haburas kultura konsidera malu

Hahii kostume respeita an

Ó hetan lia anin hu lakon tiha

Ó hetan insultu la liga tiha

Kalma nafatin ho ulun malirin

Lalehan-Sadi’a-Rai-Sei-Tane.

-o0o-

Kantór ba Kampaña (e.p 149)

Kantór ba Kampaña

Iha palku leten, ó hananu  ó-nia planu

Iha palku leten, ó fakar promesa

Iha palku leten, ó hatún adversáriu

Ó ke’e lia moruk, fakar lia midar

Ó lansa propaganda, fahe promesa

To’o dalan klaran tama kruzamentu

Ó finji lahatene, la’o la hateke

Ó la’o ó-nian, la liga rai

Ema ruma foti liman, finji la koñese

Ema balun husu dalan, finji lahatene

Ó hananu de’it iha tempu kampaña

Ó hamrók podér piñór promesa

Ó kuda promesa fuan laiha

Fuan laiha tan funan namlaik

Namlaik namtate morin oras baluk.

~o0o~