Tempu Sama Hare iha Manatuto - ili Rentau (e.p 176)

Oras sama hare - iha ili Rentau

Nahe hare ho kain - ba biti boot

Feto mane hamutuk - sei kaer liman

Kaer liman hadulas - hodi hananu

Hananu ho Galolen - hodi sama hare

Fetorán mane klosan - rame liután.

Hananu hahú - ho refraun

“Ina Noi ye - go to’un ti ga mai”

“Noi Ina Noi ye - go to’un ti ga mai”

Kantiga oioin - tutan ba malu

Sama hare haksolok - to’o rai naroman

To’o rai naroman - tuir lisan rai nian.

~::~

Iha Uma De’it Tanba Ta’ut Corona (e.p 175)

Na'i Lulik nu’udar bibi-atan di’ak

Harohan mai ami bibi oan sira

Rai lulik uma-lisan, rai ne’e nian

Nu’udar lutu, satan balada fuik

Corona matan bubu buka han ema

Uma lisan rai ne’e, sei la fó biban

Loriku rai dok buka dik funan

Kakoak uma let la fó fatin.

Odamatan igreja taka ba sarani

Taka netik sarani, la tuir misa

Loron Páskoa to’o mai, iha uma de’it

Sunu lilin Páskoa nian, iha uma de’it

Bee-sarani malirin la da’et mai

La da’et mai tanba la hakat bá

Ida-idak sunu lilin iha uma de’it

Simu bénsaun Páskoa nian, iha uma de’it.

Tan de’it corona, hakat la luan

Hakat la luan, tan ta’uk ó corona

Ema hotu hakarak hetan moris naruk  

Hakarak moris naruk, iha uma de’it.

~::~

Stay Home (e.p 174)

Stay Home

Bem vindo Um de Abril

Ó to’o mai lori mós lia-loos

La lori lia bosok - lia piadas

Maske ohin dia un - loron bosoktén

Stay home tiha de'it - lia la kona

Hakmatek ó uman - hein lia foun

Hasees-an tiha - hosi Covid dezanove.

~::~

Ha’u-nia Doben Morena Sees ba Corona (e.p 173)

Tan de’it Corona ita la hasoru

Loja sira Dili laran odamatan taka

Estrada badín ema la rame

La’o iha estrada la hasoru malu.

Estadu Emerjénsia aplika ona

Labele tur grupu lurón ninin

Evita Corona da’et ba malu

Kuidadu Corona da’et ba doben.

Corona da’et mai, la hosi anin

Corona belar an, hosi liman-fatin

Labele re’i malu ka kaer liman

Obriga ita ho distánsia sosial.

Estudante oan sira halai mohu

Tabele ba bus halai bá foho

Halai bá foho tan ta’uk Corona

Corona da’et mai tama ho silénsiu.

Laiha lian, laiha tarutu

La’ós kilat, la’ós rama Ambon

Nia mosu mai la husu lisensa

Nia tama mai nu’udar na’oktén.

Nia hakarak liu mak rai malirin

Nia ta’uk liu mak rai ne’ebé manas

Karik doben Morena hetan Corona

Bok-an ho rápidu bá hasoru médiku

Ha’u-nia doben Morena ó iha-ne’ebé?

~::~

Pasu Preventivu hodi kombate Corona virus

 

Pasu Preventivu hodi kombate Corona Virus

Bafa ai-bakmoruk nia sos ho bee manas nakali, kanuru han 1 ba kopu isin 3 ka 4, kopu 1 bele fahe ba labarik na'in 3 ka 4, no kopu ida fahe ba ema adultu na'in-2. Loron 1 hemu dala-2 iha dadeer no kalan. Nia nesan bele kahur ho bee morna hodi kose ba isin, susuk sei la mai besik ita. Karik sente laran kman bele koko rasik hahú ohin. Info idatan mak baukmoruk bele hodi kura moras oioin. Esforsu hotu bele la'o ho susesu bainhira akompaña ho boa vontade.

Hadomi Ita-an To’o Ema Seluk (e.p 172)

Maluk, ó di’ak ka lae

Semana ida ona la rona is

Maluk, ó iha-ne’ebé

Semana kotuk iha loos ne’ebé

Kadalak suli mutu sai bee inan

Tama mutu suli tun sobu sidade

Maluk, ó iha-ne’ebé

Dezastre naturál sobu ema nia uma

Pesti foun CORONA ameasa mundu

Mundu tomak haksumik buka defeza

Defeza ba povu ba maun alin.

Maluk, ó sente oinsá

Ha’u fuan ki’i no ta’uk tebes

Hasoru malu karik keta kaer liman

Tabe de’it hosi dok la besik malu

Aimoruk seidauk iha keta haluha Orasaun 

Ita Fé mak forte Corona sei la tama.

Maluk, keta haluha tau maskra

Fase liman ho sabaun molok atu han

Hanorin ita oan no maun alin

Hadomi ita-an to’o ema seluk.

~::~

Kameli Morin (e.p 171)

Kameli Morin

-

Kameli tahan lotuk, naran oioin

Abut hosi rai Timor, morin lemorai

Nia morin lemorai, futar rai nian
Futar rai nian, mina-morin rai ne'e.
~::~

Nota:

Ai-kameli tahan (Tetum)

Folhas de Sândalo  (Português)

Sandalwood leaves (Inglês)
Daun Cendana (Indonesia)

Ha'u orgullu tanba ita-nia rain iha Ai-horis ida ne'ebé avó beiala sira hanaran "Ai Kameli". Dezde tinan rihun-6 (6000) liubá nogosiante Xineza sira hakur tasi mai buka nia. Ita-nia avó beiala sira mesak analfabetu no laiha koñesimentu kona-ba ai-horis ida-ne’e entaun sira fa’an ba Xina oan sira hodi troka de’it “hena no aihán”. Tanba ai-kameli moris iha rai Timor laran tomak hahú hosi lorosa’e to’o loromonu NTT nian, entaun Indonézia bolu ilha Timor nu’udar ilha de sândalo (pulau cendana). Oras-ne’e iha ONG balun mak hahú enkoraja populasaun atu hadomi, valoriza no kuda ai-kameli tanba iha valór boot no folin karun. Iha tempu okupasaun Indonézia, iha fábrika mina-morin Ai kameli iha subida Fatu-Ahi nian ne’ebé oras-ne’e abandonadu. 

Dalan Klot Ba Ema Ki'ik (e.p 170)

*

Foin book-an - sira 'trava' netik

Foin hakat pasu rua - sira 'selok monu' tiha

Dalan atu naruk - sira 'hakotu' uluk

Tempu atu luan - sira 'habadak' tiha

Ata oan ki’ik - book-an 'labiban'.

**

Vendedór ambulante -  movimenta tuir oras

Toka nia múzika - dada atensaun

Kompradór atu sosa - sei dada is

Sasán folin sa’e - doit rahun la to’o

Doit rahun la to’o - tan dolar la sirkula

***

Vendedór iha merkadu - habai-an ba loromatan

Hein kompradór - mai fihir nia sasán

Fihir netik ba - la hola mós la buat

Fihir barak liu - sosa mak uit

Sosa mak uit – tan tuir kapasidade.

****

Pasiénsia de’it ona - simu realidade

Programa tun mai - sira Xumba tiha

Orsamentu la Pasa - tan de’it Ambisaun

Iha leten - Xumba OJE

Ata oan iha kraik - hakat dalan klot.

~::~

Tansá La hamutuk (e.p 169)

To’os boot imi kaer Tinan Rua laran

Aihoris fuan laek batar boen hotu

Serbisu Tinan Rua folin laiha

Atu tama Tinan Tolu imi fahe malu.

-

Fahe malu tan de’it la rona malu

Fahe malu tan de’it buat laek ida

Imi koko hatudu komedi furak

Parente rai dok rona hamnasa

-

Iha leten hatudu imi-nia jeitu

Ema ki’ik iha kraik, haree laran moras

Laran moras tan imi la loke laran

Tinan Rua kaer to’os kaer saugati.

~::~

Hakmatek Nafatin Iha Ó Fatin (e.p 168)

Anin boot tarutu hosi kapitál

Tarutu lemorai tama aldeia

Laloran tasi nian baku rai maran

Baku monu na’in-3 iha Sesta kalan

Maun alin inan feton tur hakmatek

Hakmatek hodi simu realidade
Hakmatek hodi hein novidade foun.

~::~

Fase Matan Lai (e.p 167)

Fase Matan Lai

-

La hadomi tanba la koñese

Midar ka moruk ó koko hotu ona

Mutin ka metan ó haree moos ona

Agora ó tuur hateke hodi hanoin

Hanoin tan atu halo lerek sa?

Hanoin tan atu koko tan sa?

Di’ak liu la’o lakon de’it

Bá fase matan lai iha lidun ruma.

   ~::~

Hein Mak Hein (e.p 166)

Maun Tomás halo-an haree la sente

Mau Peu halerik husu hela tulun

Husu hela tulun tuir maun promete

Promete hotu tiha haluha lakon.

~

Maun Tomás hatene daudaun finji la haree

Goveia ain moras la’o labele

La’o labele tanba ain uat sin

Kontente hosi li’ur subar hela moras.

~

Iha Basar laran maun Tomás doko rai

Maun Felis Regadór lakohi lakon

Knaar rihun-neenulu nu’udar promesa

Promesa hotu tiha la hatudu tuir.

~

Maun Tomás, maun Felis, hanoin tetu lai

Goveia nia moras rai-dook temi

Maun Xiku la’o ketak la liga rai

Mau Peu kbiit laek hein mak hein.
~

Ó keta dehan: ha’u soe lia

Ó keta katak: ha’u bobar lia

Ó ibun beek, ó kabeen boot
Ó lohiteen be, ó domin laek!

~::~

Loron Nakfilak ba Kalan (e.p 165)

Hosi nabilan loromatan ikus

Hakat ba kalan roman fulan nian

Leten as sei nakonu ho nabilan fitun nian

Anin hu hakmatek rai sei badín.

 -

Mehi balun mak ha'u haluha kleur ona

Ha’u loke hikas album foto antiga

Ba domin ksolok be karik ha’u iha

Biban furak balun be karik lakon let.

 -

Hosi dapur, ha’u horon kafé suhan morin hosi oan feto

Ha’u tur silu ain iha varanda

Rona mós viola lian hosi viziñu

Simu ha’u-nia kafé timis mesmesak

Susuk ruma tata mós ha'u la sente.

~::~

Malirin (e.p 164)

MALIRIN
-
Tempu anin malirin iha rai-manas

Malirin hanesan fali, rai-malirin

Malirin hosi loron to’o tiha kalan

Malirin hosi kalan to’o mai dadér

Ibun kulit maran isin lolon kaskadu

Reboka handbody hodi hamamar

-

Tinan ida-ne’e lahanesan tinan kotuk

Dadeersan kaer bee, isin tata’uk

Lokraik atu hariis, isin tata’uk
Babeur ita atu lalika hariis

Obriga ita atu hatais farumanas

Malirin tinan ne’e han tempu naruk.

-::-::-::-

Hanoin-Hikas Setembru Negru Noventa Nove, Tinan 20 Liubá

Mota Laran Lu-Amut - Kairui, Manatuto 11 de Setembro 1999

~

Hanoin-hikas situasaun Setembru Negru noventa-nove, altura ne’ebá ha’u serbisu ho UNAMET, bainhira ONU anunsía Rezultadu Votasaun iha 4 de Setembru 99, no Staff Internasionál sira tenke sai hosi Manatuto husik hela ami, entaun iha 6 Setembru, ha’u evakua ho joven na’in 2: primu Manaduk ho kolega Filipe de Carvalho (ho naran estimadu:Ibik) bá natar ninin Kuruk-Lidun Manatuto nian. Ami lubun ida mak toba iha ne’ebá hamutuk ho profesora Madalena ho nia oan sira, belun Armada (Geraldo Gomes), belun Carlito Pinto ho nia kaben, nst.  Tuirmai kronolojía evakuasaun: 

·         6-9-99:      Evakua hosi vila bá toba iha natar ninin Kuruk-Lidun área Aiteas nian.

·         7-9-99:      Sa’e foho bá Wegaba (sei iha área Aiteas). Ami akampa iha mota ninin, foho lolon sira, no informasaun hosi ema rai-na’in katak “labele hariis ho sabaun, se lae mota bele maran tiha tanba rai ne’e lulik”, labarik joven sira sente estrañu uitoan no ladún fiar, entaun liu de’it loron 5 mota mós maran. Ami tenke buka fatin seluk ne’ebé iha bee.

·         11-9-99:      Dadersán, Ha’u bá buka aihán iha Kairui tuir señór Simião Latiboe no tiu ida ho naran koñesidu Asala, hosi nia dialetu ha’u identifika nia ema Laleia, portantu sira na’in-rua mesak ema Laleia oan. Ami tama Kairui oras lokraik ona, ha’u tama kolega Duarte (naran kódigu: Rame [agora membru PNTL]) nia uma, susubeen kopu boot ida nia prepara hela ba nia-an hatuur hela iha meziña ida leten, ha’u tama bá... ha'u hemu hotu tiha la fó tan obrigadu. Ha’u ho irmaun Duarte Rame koñese no toman malu kedas durante tempu rezisténsia. Ho susubeen ne'e ha'u sente bele bosu netik uitoan. Populasaun Kairui evakua sai hotu bá ailaran, kios ida mós laiha, ami tenke fila-fali ho liman mamuk bá Wegaba. Tuir dalan, ha’u konsege hetan tan kolega na’in tolu, no ami hasai lai foto. Sira kontinua evakua nafatin, entaun ami tenke fahe malu.  Ami na’in-3 (hau, Latiboe, Asala) sa’e nafatin mota to’o hetan fali irmaun João Timóteo ho nia família rai hahú nakukun dadauk ona. Iha-ne’e ami sente di’ak fali ona, ami toba lai iha-ne’ebá iha mota ninin ai-kakeu laran, Lu-amut nian.  

·         12-9-99:      Dadersán de’it ami fila-hikas mai Wegaba. Tuir dalan ha’u hakfodak tanba hetan fali sobriñu Maunó Guntur, sira  mós foin bá hosi Dili. Sira kontinua bá Waimory no ami tenke sa’e fali foho boot ida ne’ebé hori sehik ami liu ne'e hodi tuun fali mai ami-nia akampamentu Wegaba.      

·         13-9-99:      Ami muda fatin bá fali mota ulun ho naran Akampamentu Mata-Ahuk, tanba bee mota Wegaba nian maran ona.

·         16-9-99:      Komandu Falintil delaga maun Domingos Apai matebian ho Regu Armadu ida bá fó orden atu refujiadu ne’ebé akampa iha foho lolon sira tenke tun bá konsentra iha Kairui hodi bele asesu ba Aihán ne’ebé aviaun hatuun mai refujiadu sira. Ami liu fali hosi Lu-Amut bá akampa iha mota ninin/ natar laran Tabakurón. Durante ami akampa iha Tabakurón aviaun konsege hatuun aihán kuaze dala-3 de’it, ne’e mós hadau malu mate mak bele hetan uitoan. INTERFET tama iha Dili ami iha Ailaran.

·         24-9-99:       Ha’u ho joven na’in-10 bá Komandu Falintil iha Waimory hodi husu ajuda netik aihán ruma. Joven sira-ne'ebé ha'u sei hanoin sira-nia naran mak hanesan: Aboik (PNTL), Filipe de Carvalho, Abis - Edes - Malaku - Ivan, sra-na'in-4 mesak maun-alin, tama tan Ajó (tiu Joaquim eis Xefe Suku Primeira) nia oan mane, Asara, nst., inklui tiu Amutin matebian ho nia oan mane Nelio no oan mane ikun Aninu. Komandante Falur Rate Laek mak simu ha’u ho grupu,  no komandante Falur fó orden ba adjuntu Tiger Kablaki hodi arranja fos saku tolu mai ami, ha'u hetan fali sobriñu Maunó Guntur iha ne'ebá, ha'u buka fali irmaun Arca atu husu netik tabaku ruma, seidauk hetan malu, rona sira bolu ha'u-nia naran entaun ami aproveita kedas truk vaskolante ida atu bá Kairui tula hela ami-nia fos.

·         1-10-99:      Ami komesa tama fali ona, maibé ami sei refujía iha Kairui laran iha irmaun Tomé /eis-profesór ida nia uma, oras-ne’e irmaun Tomé muda fali nia profisaun no servii fali nu’udar PNTL.

·         7-10-99:      Ami bele tama hikas ona mai Manatuto mai haree fali Manatuto nia oin foun ne’ebé nakonu ho lalar-asu, nakonu ho ahi suar no latun nakonu ho tristeza no matabeen. Bele imajina, ita to’o iha igreja Manatuto, ita bele hateke hetan loja Uma Fatuk ho distánsia kuaze metru atus-4 nian ne’ebé antes ne’e haree la borus, maibé  tan de’it Milísia Mahadomi sira sunu, Manatuto laran sai tetuk tiha hanesan kampu. Ita haree fali ona lona azúl hosi asisténsia umanitáriu UNHCR nian mak dada iha bairru laran. Biar Triste maibé Haksolok mós tanba bele hasoru fali família ne’ebé namkari lemo-lemo tan de’it atitude Milísia Asasíniu sira. Ami bá toba iha Hiban Rasa, to’os tia Adai sira-nian, tia Adai ho tiu Mutin matebian ne’ebé uluk ha’u hela ho sira iha Taibesi durante SMA tinan tolu nia laran, ami mak halai hamutuk no fila mai mós hamutuk nafatin.

·         8-10-99:     Maizumenus iha dadersán tuku 8, ha'u tenke despede hela sira iha Hiban Rasa no ha'u tenke sai ba hein karreta hosi lorosa’e mai fali Dili. Ha’u tuun iha Merkadu Lama, atuál CCD (Centro Convensão Dili).  Ha’u hakat bá lai prima Izu sira iha Audian, la kleur tia Binda nia mane-foun, prima Rosa Sarmento (Aroza) nia la’en tama bá ho motorizada Honda Win ida bá buka primu Anízio, entaun ha’u empresta lai nia motorizada bá haree to’ok uma iha Becora. Laran moras no hakfodak tanba uma la hetan sunu maibé Milísia Kedua lelaun moos sasán uma laran. Sobriñu Maunó Guntur to’o uluk ona iha Dili, nia hakerek hela iha janaela hun parte uma kotuk: “Biar Hangus Asal Merdeka” signifika “Biar Motuk, Naran Ukun-an”.

·         9-10-99:      Ha’u bá aprezenta-an fali iha eskritóriu UNAMET Balide atu loke fali pájina foun nian ba Ukun Rasik-an. Setembro Negro atu metan ka mutin ita liu ona, midar ka moruk ita koko ona. Akontesimentu pasadu halót ona ba istória, ita hein fali futuru nian ne'ebé bele nabilan ba povu tomak no futuru jerasaun rai doben ida-ne'e nian.

~::~

Moruk Noventa Nove (II)_(e.p 163)

(i)

Rezultadu hosi Votasaun Referendu 

Wain ida ohin tama tinan-26

Hanoin hikas ba oras rezultadu

Oras rezultadu ba pájina foun.

(ii)

Ita be manán, halai bá foho

Sira be lakon, halai bá Atambua

Halai bá foho hodi buka moris

Bá Atambua mós hodi buka moris.

(iii)

Biar Milísia sunu motuk ita uma fatin

Biar Motuk ka Ut ita Ukun-an

Ukun-an dala-ida - metin bá oin

Ukun-an dala-ida - ukun ba beibeik.

(iv)

Sira bá  Atambua, halai ho Ta’uk

Ho Moe ho Susar halai bá nafatin

Halai bá nafatin tuir orientasaun!

Ulun boot Autonomista lohi let sira.

(v)

Ahi-suar no latun - fahe grupu rua

Autonomista Independentista - se kotuk ba malu

Bainhira udan solur - motuk no ahi-latun

Governu Planeia harii CAVR.

(vi)

CAVR moris - hodi fasilita

Simu-malu, Lia-loos, no Rekonsiliasaun

Hatudu ba Mundu Timoroan Hadomi Dame

Haklaken ba Mundu Timor Dame Na’in.

~::~

Moruk Noventa Nove (I)_ (e.p 162)

(i)

Istória moruk noventa nove

Milísia kontrola molok Referendum

Tiru kilat tarutu hata’uk povu

Ameasa povu TENKE hili Autonomía.

(ii)

Milísia ameasa tiru kintu kantu

BRTT akompaña lansa propaganda

Propaganda si’ak, povu fuan ki’i

Fuan ki’i, tan rona lian ameasa

La hakmatek, tan rona kilat tarutu.

(iii)

Suara Timor-Timur loke nia pájina

Chico Lopez alerta ba Timoroan

Otonomi menang darah menetes

Merdeka menang darah mengalir.

(iv)

Timoroan fuan toos la ta’uk mate

Iha loron votasaun vota ho kalma

Konfia ho kalma tuir konxiénsia

Timoroan hamutuk bá ukun-an.

(v)

Iha Kuatru de Setembru Noventa Nove

Anúnsiu rezultadu hosi Kofi Anan

Rona rezultadu, hakoak malu ho matabeen

Matabeen haksolok bá ukun-an.

(vi)

Autonomista oan sira sente Moe Boot

Hamutuk ho milísia, sunu sidade laran

Hamutuk ho milísia oho maun-alin

La importa fetosán ka umane

Haloot sasán halai Mota-ain

Husik hela ahi-suar no ahi-latun. 

(vii)

Husik lerek matabeen no lunturu

Soe lerek knua doben ba rai seluk

Bá moris rai seluk nu'udar La'orai

Bá hela knua foun nu'udar Bainaka.

~::~