Na'i Ulun Rai Ne’e Bok-an Ba (e.p 201)

(i)
Mota boot harahun povu nia uma
Harahun lurón, sobu mós ponte
Halakon vida, hamate esperansa
Koitadu... susar ida baku ita, povu sala laek.
(ii)
Matabeen lunturu, tan lakon família
Ha'u fuan kanek, tan haree sira susar
Ha'u susar duni, maibé sira liu ha'u
Rai Lafaek mós tanis, haree nia emar
Emar be terus, tan simu todan ne’e.
(iii)
Na'i ulun Rai ne’e, bok-an ba
Lolo liman netik mai, ami terus na’in
Dada sa’e lai ami, hosi tahu laran
Hakbiit netik ami, ho naha todan ne’e
Hi’it hikas ami, tuir dalan ne’ebé dignu.
(iv)

Hakmatek uitoan, hamoris esperansa

Hakmatek simu hikas, loromatan foun

Haraik manas, hanas hikas rai bokon dodok

Rai dodok nakfera, tan tempestade Kuatru Abril.

~::~

Oan Timor Oan Terus Na'in (e.p 200)

Serka Sanitária povu trauma

Serka Inundasaun trauma liutan

Ponte no estrada - kotu kintu-kantu

Udan turu tun rai - turu la kotu.

-

Telefone malu - rede be kotu

Halo ita lakon - info ba malu

Husu de'it ba Na'i - tulun ita hotu

Ita mesak Oan Timor - Oan Terus Na'in.

-::-

Hakmatek (e.p 199)

Hakmatek iha fatin biban ida-ne’e

Hakmatek iha biban Cerca Sanitária

Halo tuir orden hosi na’i ulun sira

Sei di’ak ba ita di’ak ba nasaun.

-

Nasaun enfrenta risku boot ne’e

Risku boot semo hosi tasi-balu mai

Impaktu habelar ba povu tomak

Povu ki’ik fila liman susar liután.

~::~

Taka Portaun Satan Corona (e.p 198)

Ema hotu oras-ne’e - moris ho ta’uk

Ta’uk ba Corona - no polísia.

Corona hakat mai - da’et nia kutun

Polísia kontrola - kaer ho aidona.

Aidona hata’uk - ema maskra laek

Eduka ema - abitua uza maskra.

-

Corona nia hun - hosi tasi-balu

Corona nia abut - ema matan-bubu.

Dalan foun tama mai - hosi fronteira

Zigzag titiriik - buka salva-an.

Portaun fronteira - taka metin tiha

Loke kois portaun - Covid tama kedas.

-

Nia tama karik - ó haree oinsá?

Nia da’et karik - ó nota oinsá?

Di’ak-liu antesipa - uza ho maskra

Furak-liu prepara - hand sanitizer.

Di’ak-liu lalika - kaer malu liman

Furak-liu lalika - re’i malu hasan.

-∷-

Cesta Bázika Hatutan Povu Nia Moris (e.p 197)

Cesta Bázika tuun mai tulun iha baze

Cesta Bázika hakbiit povu rai laran

Komunidade sente duni nia benefísiu

Ata oan simu duni ho haksolok.

 -

Povu oan hein duni hosi ita-boot

Hein duni ita-boot tuir promesa

Promesa hosi leten tuun mai kraik

Ata oan terus-na’in simu duni ona.

-

Cesta Bázika foufoun barak protesta

Protesta daudaun simu daudaun

Simu daudaun tan situasaun

Situasaun obriga tane daudaun.

-.-

Maubere ho nia Istória Metan no Mutin

Foho Maubere ho nia istória metan no mutin

Foho Maubere situadu iha posto Administrativo Laclubar no pertense ba suku Batara. Iha foho 3 mak Maubere, Kehatu no Lianbau mak forma hanesan letra U hodi fó salvaguarda ba posto administrativo Laclubar hodi hateke tuun ba tasi liuhosi foho Henuk. Dalabalu ema hanoin katak naran Maubere foin mosu iha tempu rezisténsia, maibé lae, Maubere nia naran dezde avó beiala sira. Maubere mós iha nia istória balun mak interesante atu haktuir ba ema foin-sa’e sira. Iha istória furak atu rona no iha mós istória metan ne’ebé mosu nu'udar konsekuénsia hosi funu ukun rasik-an ida-ne’e. Maubere mós bele dezenvolve ba fatin TURIZMU ho nia paizajen furak ne’ebé iha. 

Metan

Hosi parte metan, iha inísiu fulan Janeiru 1979, militár Indonéziu kaptura família Prezidente Nicolau Lobato nian hodi bá oho no hakoi hamutuk iha rai-ku’ak ida, iha postu vijilánsia Maubere 2 (militar Indonesia hanaran Pos Maubere Dua). Família ne’ebé TNI oho mak: Prezidente Nicolau nia Inan doben Felismina Alves Lobato, alin feto Madalena Lobato (Anena), alin mane ikun Azé Lobato, no feto ida tan mak lahatene nia identidade (deskonfia nu'udar prezidente nia kaben). Sira-nia restus mortais rekolla ona iha Maiu 2002 no lori bá haloot iha Leorema Bazartete.

Mutin

Hosi parte mutin, hori tempu uluk Avó na’in-2, ida hosi Ma’abat Manatuto, ida fali hosi Batara Laclubar. Sira na’in-2 hamutuk ho katuas lia-na'in na’in sira halo akordu ida, karik avó Ma’abat mak manán nia manán tiha foho Maubere, karik avó Batara mak manán, nia manán tiha Masin Balak Manatuto.  Kompetisaun hahú hosi Balak Manatuto, avó Laclubar tuur la hatais faru hodi habai-an hahú hosi loromatan sa’e to’o loromatan monu, no nia konsege duni habai-an loron tomak lahetan dezafiu. Tuir fali avó Ma’abat bá toba iha foho Maubere tutun la hatais faru nein taka manta. Avó Laclubar prepara duni uma oan ida ho hadak au matak, didin ho tua tahan matak. To’o kalan boot, testemuña hosi fatin 2 Ma’abat Laclubar bá haree no avó Ma’abat hasan toos ona koalia ladi’ak, nune’e, avó Laclubar hakfodak hodi hasee ho lian galole hanesan Apati: Auwoh…! Amaretik Lin Taik Ba! (Amaretik Lian Laiha Ona), nune'e foho Maubere tenke metin nafatin, no Masin Balak Manatuto tenke tama ba Laclubar nia liman. Dadersan loromatan sa’e, avó Laclubar hamriik iha Maubere tutun hateke ba Manatuto hodi dehan ho lian Galole: Ga abrii nai huhun naon tun tasi, Naon batak ba masik lidar e taik, Naon batak ga masik sani e taik (ha’u hamriik hosi foho tutun hateke tuun tasi, haree to’ok ha’u-nia masin te’in ka lae, haree to’ok ha’u-nia masin nono ka lae).

Agrikutura

Xefe Suku Batara Tomás Pinto ho nia kriatividade no esforsu tomak, nia konsege harii Kooperativa Kafé ida ho naran “Wild Coffee of Maubere Mountain”. Kooperativa ne’e hamriik iha Associação Café Timor nia mahon. Ha’u konsege dadalia uitoan ho Xefe Suku Batara iha 23 de Dezembru tinan kotuk iha CCD, nia haktuir katak bainhira COVID-19 seidauk tama, kuaze kada semana vizitante sira bá hasoru nia no hakarak sa’e ba foho Maubere tutun hodi haree paizajen furak Maubere nian.

Aleinde foho Maubere, vizitante  sira mós hakarak vizita "Hospital Saúde Mental" ne’ebé lokalizadu iha suku Batara. Iha-ne’ebá bele kura moras mentál no TBC. Karik belun sira sente sintomas ruma bele hakat liubá hodi haree ho matan kaer ho liman._

Aikranik ida Manu-knuk ida (e.p 196)

Aikranik ida Manu-knuk ida

-

Loriku Lakateu hadoben malu

Aikranik ida be manu-knuk ida

Biar tempu Corona la ses malu

Hamutuk hadoben manu-knuk ida

-

Ha'u Abut Ha’u Rain Doben Timor (e.p 195)

Rai ki’ikoan ida iha mundu klaran
Rai ida úniku reziaun Ázia
Nia oan lemo rai lemo Tasi-balu
Sai hosi Timor lemo Tasi-sorin
 -
Timoroan rai li’ur keta haluha
Tinan ida dala-ida mai vizita fali
Sama netik ita rain sama ho domin
Hadomi ita rain liu rai seluk.
 -
Hanoin ita rain tau iha fuan
La’o lemo ema rain hanoin ita lisan
Lian tetun, ho tais, nu’udar kultura
Hametin haburas identidade ita-nian.
 -
Hanorin ita oan hatais Tais
Hanorin ita oan ko’alia Tetun
Hanorin ita oan múzika Tebe-tebe
Hadomi ita rain hosi rai dok.
 -
Lori ita-nia Lisan sai bá mundu
Lori hikas mundu seluk mai ita rain
Ita rain nu’udar aifunan buras
Aifunan buras sei dada ema mai.

-::-

Kmanek Loron Finadu (e.p 194)

Lahatene ohin kalan maluk iha-ne'ebé

Karik maluk iha foho ita hanesan 

Aban loron ita-nian vizita matebian

Maluk iha fatin seluk ha'u iha-ne'e

Filafali ba fatin fila ho kuidadu

Kmanek loron matebian ba maluk hotu.

-

Roda Tolu Zero Poluisaun (vídeo badak-I)

Transporte roda-3 ka ema toman bolu ho naran "ojek" iha munisípiu Manatuto ho nia totál purvolta-de 200. Motorista roda-3 nian halai livre buka pasajeiru tuir vontade, kada pasajeiru bele selu 25-50 séntimus. Haree ba estrada kapitál munisípiu nian ne’ebé klot hela entaun roda-3 sufisiente duni atu movimenta bamai ho livre hosi dadeer to’o lokraik molok tuku 9 kalan. Roda-3 sai mós nu’udar meius transporte ho zero poluisaun ne’ebé kria ka akontese uluk iha munisípiu Manatuto. Iha segunda semana hosi fulan Outubru 2020, ha’u ho oan feto halo viajen bá Manatuto ho bus Baucau nian, ami na’in-2 tun iha Monumentu dalan-fahen nian hodi kontinua halo viajen tama ba sidade laran sa’e fali roda-3 ne’ebé lian hanesan susuk maske nakék nakék uitoan maibé furak tanba halai ho kalma no zero poluisaun.

Hun Ida De’it Sanak Oioin (e.p 193)

 Hali hun Timor sanak oioin
Tahan tebar namahon furak be furak
Furak be furak fó matak malirin
Tebar be tebar hodi halibur nia oan.
-

Hali hun Timor sanak oioin
Tahan lemo rai seluk abut kaer metin
Abut kaer metin fó kbiit liután
Kbiit liután hodi metin ba oin.

-

Cesta Bázika (e.p 192)

Lansamentu Cesta Bázika - hahú Metinaro
Turu tun ba povu - la ho udan been
Esplikasaun klara - povu kompriende
Cesta Bázika nu'udar apoiu solidariedade

-

Nu'udar Lapis Rohan Ida (e.p 191)

Nu'udar Lapis Rohan Ida

-

Moris ne’e nu’udar Lapis rohan ida

Neineik sei mohu tubik to’o hotu

Neineik sei soe let ba rai.

Molok mate sei halo netik rai naran

Molok mohu sei hakerek netik buatruma

Hakerek netik hodi temi ó naran.

-

Rai Hau-nian Ha’u Moris Fatin (e.p 190)

Ó ha’e naroman furak mai ha’u
Ó ha’e lalenok ba vizaun
Ó ha’e furak ne’ebé ó fahe mai
Halekar ó domin no admirasaun 
-
Ó be haraik roman, hela di’ak ba
Hodi hakat liu bá loron foun seluk
Dadeer hadeer hikas, hosi moris ne’ebé dukur
Bainhira ó fó netik kalan hodi deskansa
-
Ó ha’e suavidade hosi solidaun
Bainhira kalan toba la dukur
Ó ha’e lalenok motivasaun dadeer nian
Ó luta tinan ba tinan la husik liu
 -
Ó-nia furak mosu mai, bainhira loromatan monu
Kor kmo’ok nian hosi ó-nia natureza
Ó ha’e esperansa, hosi biban loromatan sa’e
Ó sei hadeer hikas, hodi buka lialoos.
 -
Rai ne’e moris hosi Na’i domin na’in
Hakbiit ha’u la’o, monu hadeer, aprende, no sai boot
Ha’u-nia domin rohan laek ba ó Timor
Rai ha’u Rain, hosi ne’e mak ha’u moris.
 -
Hakoak oan sira, hodi tane ó
Halibur emar sira, hodi bali ó
Tane bali ó ho domin laran moos
Tula dikur ba malu sé bok ó.

~::~

Nehan Moras (e.p 189)

Nehan moras ida-ne’e tahan labele

Atu fokit la fokit, losu la losu

Fó tan aimoruk ba loron lima

Loron-1 dala-3 to’o loron lima.

 -

Enfermeira dentál pasa reseita

Reseita oan ida, bá hasai ran

Hakarak hatene moras oin hira

Moras ida la hotu buka nia foun.

~::~ 

Hadak-Inan Naksobu (e.p 188)

Tempu udanlor rai fila manas

Atu tama ba bailoro manas sa’e tan

Iha to’os laran tiu tia haksesuk

Sobu rahun 'hadak-inan' sai runguranga

To’os oan hakfodak haree hodi rona

Haksesuk malu tan hadau hadak-oan.

 -

Tia oan na’in-rua lakohi lakon

Ibun baku ibun liman rakut malu

Rakut malu tan de’it liafuan insultu

Liafuan 'insultu hakanek laran'

Hakanek laran hafo’er sentimentu

Sentimentu nu’udar ema tetu na’in.

~::~

Odamatan Rai Nian Taka Metin Duni (e.p 187)

Coronavirus fulun mihis ona

Kutun mate daudauk ikun kuaze tuk

Coronavirus mai doko rai

Halo ema ta'uk-an sulan iha uma

Fó biban ba família  hetan subsídiu.

-

Moras ida-ne’e nu’udar pesti ida

Nia sa’e aviaun tama ita rain

Mai buka ita hodi habelar nia kutun 

Durante fulan rua dalan klot hela

Subsídiu fulan rua sei tun duni.

-

Coronavirus fulun dois ona

Anin hu namtate hela de’it naran

Governu deside loke livre fali

Movimentu rai laran normal hikas

Komunidade nadodon tama sede suku.

-

Agradese ba Ekipa Covid-dezanove

Serbisu maka'as iha liña oin

Hatudu duni responsabilidade

Kontrola mantein estabilidade.

-

To’o ona tempu atu haksolok

Hananu tebe dahur iha bairru laran

To’o ona tempu, mai tan malu

Hasoru fali malu hanesan uluk.

-

Orasaun loron kalan funan mosu duni

Rai lulik matebian taka metin duni

Taka metin duni tuir ita-nia hamulak

Taka metin duni dalan ba pesti ne'e.

-

Maske ikun tuk mós tenke kuidadu

Biar kutun mate mós tenke matan moris

Matan moris, tan nia bele da’et fali

Bainhira importasaun, tama foun mai.

-

Biar livre karik ba, mantein regra Covid

Uza ó-nia máskara bainhira atu sai

Mantein nafatin distánsia fízika

Keta haluha mós fase

liman ho sabaun.   

(ff)

Dollar Falsu Hahú Loke Nia Liras (ep.p 186)

Matan moris neon na’in ba Dollar Falsu

Nia dolar nonook tama bairru laran

Nia ladún boot ladún mahar

Ladún todan hanesan orijinál.

-

Nia koko tama ona iha kios balun

Kios na’in koñese tiha lakohi simu

Fihir didi’ak, sukat ho dollar tebes

Fó filafali ba dollar falsu na’in.

-

Balun dehan nia mai sobu ekonomía

Balun dehan  nia mai atu sosa votus

Ita hakarak hatene, sé loos mak espalla

Ita tenke hatene na’in ba sé.

-

Keta lori dollar falsu hodi lohi povu

Kuitadu kasian ami povu ki’ik

Keta lori dollar falsu manipula povu

Kuitadu kasian povu aileba.

~::~

Ambeluk Iha-ne’ebé (e.p 185)

Horisehik bainrua belu bá ne’ebé

La rona tan knananuk furak kantiga foun

Ahi matan eFBí ó hamate tiha

Subar-an ida-ne’e is la sai.

- 

Bainhira hasoru malu sei dada lia

Hamnasa hamutuk nu’u baibain

Lia salak oan ruma lalika rai

Nu’udar na’an ruin soe ba asu

Nu’udar hahán sin fakar ba fahi.

~::~

Bainhira (e.p 184)

Nadodon rame-rame bá sede suku

La’o butuk sena malu sede suku oin 

Hakarak hatene lala’ok ruma

Hakarak simu netik tatoli foun.

-

Sai hosi uma ho laran metin

Ho laran metin tan tuir promesa

Promesa la kona ho lia menon

Halo ema kole let la’o bá mai.

-

Filafali bá uma tur hanoin

Bainhira loos mak bele tun mai

Tun mai halo povu laran haksolok

Mosu mai halo povu laran maus netik.

~::~