Hakarak Liu Sai Patraun (e.p 206)

(i)

Ulun moruk hakarak de'it manán

Manobra tun-sa’e buka hela votus

La rona malu la fiar maun-alin

Promesa funan buras hakat liu dalan

(ii)

Hakarak de'it sai maun boot

Lakohi hamutuk ho ema ki’ikoan

Hakarak liu sai patraun

Lakohi hamutuk aileba oan

(iii)

Maukobak tun-sa’e finji oin mamar

Oin mamar ba emar buka konfiansa

Konfiansa simu tiha haluha promesa

Abuza konfiansa lakon esperansa.

~::~

Maumesak Lemorai (e.p 205)

Maumesak Lemorai 

Maumesak lemo rai, lemo rai lubun

Hakur husi rai ida tadu rai seluk

Nani tuir ó dalan, nani ho kuidadu

Hakur ho naha todan, hakur ho sentidu

-

Ita rua nia dalan, ha'e lahanesan

Ó hosi tasi klaran, hau husi foho

Ó sama tasi leten, hau rai maran

Ita rua hasoru malu iha pontekais

~::~

Lahatene Loos (e.p 204)

Viola talin kotu - sei bele tutan

Noi nia domin talin kotu - susar atu tutan

Serka Sanitária rohan kotu - lahatene loos

Bainhira taka fali – lahatene loos

-

Kartaun Vasina sai arkivu

Teste swab  ba ita sai istória.

Noi nia domin talin kotu sai estres

Estres mai ha'u sai istória.

~::~

Programa Preparativus ba Ordenação Sacerdotal

Programa Preparativus ba Ordenação Sacerdotal

- 

Komunidade Laclubar iha Dili hosi suku Manelima no Orlalan ein-espesial aldeia Futumanuk, Kalohan, Amanún, Le’i no Torilalan hala’o Sorumutu daruak iha Salão Paroquial Becora iha Sábadu, 14 de Agostu horisehik hodi harii Komisaun Organizadora ba Ordenação Sacerdotal ba Diácono Carlos Roben Pereira (on-mane kawa’ik hosi Sr. Manuel Abrão Roben [maktoban_hosi aldeia Amanún] no Sra. Rosa Pereira hosi aldeia Futumanuk). Ordenação sei realiza iha 22 de Outubro 2021 iha Catedral Dili.

-

Bazeia ba observasaun katak, maluk barak mak la marka prezensa tanba falta informasaun. Diácono Carlos ho nia kolega na’in-3 mak hetan Ordenação Diaconal direta hosi Amu Papa iha Vaticano tinan kotuk, no sira fila-hikas mai Timor iha meadu fulan Jullu kotuk foin lailais,  no tuir programa sira-na’in 4 sei ordena fulan oin nu'udar mensiona iha leten. Sorumutu da-haat sei realiza fali Sábado oinmai (28-8-21) iha fatin hanesan.

-

Sorumutu da-haat atu diskuti fali kona-ba Missa Nova no Missa ba Laclubar tanba Amu Pároku  hakarak atu “Amu foun” bele selebra Missa Nova depoizde fulan 1. Nune’e Komisaun Organizadora tetu hamutuk katak  labele demora tanba iha Novembru nia laran Laclubar sei hasoru udan tinan, no sei difikulta sarani sira atu partisipa misa. Ho nune’e, informasaun kona-ba Missa Nova seidauk iha serteza tanba sei rona hikas hosi Amu Pároku Becora.

-

 

Ulun Moras (e.p 203)

Ulun ida moras be,

moras la tahan

La hemu aimoruk

hemu de’it bee.

Hemu de'it bee ida,

bee lorokraik nian 

kafé manas.

Kafé manas lorokraik, 

timis neineik,

Sunu tan lolon ida,

hamaluk ho kafé 

morin lemorai.

--- o0o ---

Bee no Tua (e.p 202)

Hemu bee barak kabun bele bubu

Hemu tua barak sei sente lanu

Sente lanu karik buka fatin toba

Toba nonók nakoron ha'u-nian

Nakoron ha'u-nian sé bok tan.

Na'i Ulun Rai Ne’e Bok-an Ba (e.p 201)

(i)
Mota boot harahun povu nia uma
Harahun lurón, sobu mós ponte
Halakon vida, hamate esperansa
Koitadu... susar ida baku ita, povu sala laek.
(ii)
Matabeen lunturu, tan lakon família
Ha'u fuan kanek, tan haree sira susar
Ha'u susar duni, maibé sira liu ha'u
Rai Lafaek mós tanis, haree nia emar
Emar be terus, tan simu todan ne’e.
(iii)
Na'i ulun Rai ne’e, bok-an ba
Lolo liman netik mai, ami terus na’in
Dada sa’e lai ami, hosi tahu laran
Hakbiit netik ami, ho naha todan ne’e
Hi’it hikas ami, tuir dalan ne’ebé dignu.
(iv)

Hakmatek uitoan, hamoris esperansa

Hakmatek simu hikas, loromatan foun

Haraik manas, hanas hikas rai bokon dodok

Rai dodok nakfera, tan tempestade Kuatru Abril.

~::~

Oan Timor Oan Terus Na'in (e.p 200)

Serka Sanitária povu trauma

Serka Inundasaun trauma liutan

Ponte no estrada - kotu kintu-kantu

Udan turu tun rai - turu la kotu.

-

Telefone malu - rede be kotu

Halo ita lakon - info ba malu

Husu de'it ba Na'i - tulun ita hotu

Ita mesak Oan Timor - Oan Terus Na'in.

-::-

Hakmatek (e.p 199)

Hakmatek iha fatin biban ida-ne’e

Hakmatek iha biban Cerca Sanitária

Halo tuir orden hosi na’i ulun sira

Sei di’ak ba ita di’ak ba nasaun.

-

Nasaun enfrenta risku boot ne’e

Risku boot semo hosi tasi-balu mai

Impaktu habelar ba povu tomak

Povu ki’ik fila liman susar liután.

~::~

Taka Portaun Satan Corona (e.p 198)

Ema hotu oras-ne’e - moris ho ta’uk

Ta’uk ba Corona - no polísia.

Corona hakat mai - da’et nia kutun

Polísia kontrola - kaer ho aidona.

Aidona hata’uk - ema maskra laek

Eduka ema - abitua uza maskra.

-

Corona nia hun - hosi tasi-balu

Corona nia abut - ema matan-bubu.

Dalan foun tama mai - hosi fronteira

Zigzag titiriik - buka salva-an.

Portaun fronteira - taka metin tiha

Loke kois portaun - Covid tama kedas.

-

Nia tama karik - ó haree oinsá?

Nia da’et karik - ó nota oinsá?

Di’ak-liu antesipa - uza ho maskra

Furak-liu prepara - hand sanitizer.

Di’ak-liu lalika - kaer malu liman

Furak-liu lalika - re’i malu hasan.

-∷-

Cesta Bázika Hatutan Povu Nia Moris (e.p 197)

Cesta Bázika tuun mai tulun iha baze

Cesta Bázika hakbiit povu rai laran

Komunidade sente duni nia benefísiu

Ata oan simu duni ho haksolok.

 -

Povu oan hein duni hosi ita-boot

Hein duni ita-boot tuir promesa

Promesa hosi leten tuun mai kraik

Ata oan terus-na’in simu duni ona.

-

Cesta Bázika foufoun barak protesta

Protesta daudaun simu daudaun

Simu daudaun tan situasaun

Situasaun obriga tane daudaun.

-.-

Maubere ho nia Istória Metan no Mutin

Foho Maubere ho nia istória metan no mutin

Foho Maubere situadu iha posto Administrativo Laclubar no pertense ba suku Batara. Iha foho 3 mak Maubere, Kehatu no Lianbau mak forma hanesan letra U hodi fó salvaguarda ba posto administrativo Laclubar hodi hateke tuun ba tasi liuhosi foho Henuk. Dalabalu ema hanoin katak naran Maubere foin mosu iha tempu rezisténsia, maibé lae, Maubere nia naran dezde avó beiala sira. Maubere mós iha nia istória balun mak interesante atu haktuir ba ema foin-sa’e sira. Iha istória furak atu rona no iha mós istória metan ne’ebé mosu nu'udar konsekuénsia hosi funu ukun rasik-an ida-ne’e. Maubere mós bele dezenvolve ba fatin TURIZMU ho nia paizajen furak ne’ebé iha. 

Metan

Hosi parte metan, iha inísiu fulan Janeiru 1979, militár Indonéziu kaptura família Prezidente Nicolau Lobato nian hodi bá oho no hakoi hamutuk iha rai-ku’ak ida, iha postu vijilánsia Maubere 2 (militar Indonesia hanaran Pos Maubere Dua). Família ne’ebé TNI oho mak: Prezidente Nicolau nia Inan doben Felismina Alves Lobato, alin feto Madalena Lobato (Anena), alin mane ikun Azé Lobato, no feto ida tan mak lahatene nia identidade (deskonfia nu'udar prezidente nia kaben). Sira-nia restus mortais rekolla ona iha Maiu 2002 no lori bá haloot iha Leorema Bazartete.

Mutin

Hosi parte mutin, hori tempu uluk Avó na’in-2, ida hosi Ma’abat Manatuto, ida fali hosi Batara Laclubar. Sira na’in-2 hamutuk ho katuas lia-na'in na’in sira halo akordu ida, karik avó Ma’abat mak manán nia manán tiha foho Maubere, karik avó Batara mak manán, nia manán tiha Masin Balak Manatuto.  Kompetisaun hahú hosi Balak Manatuto, avó Laclubar tuur la hatais faru hodi habai-an hahú hosi loromatan sa’e to’o loromatan monu, no nia konsege duni habai-an loron tomak lahetan dezafiu. Tuir fali avó Ma’abat bá toba iha foho Maubere tutun la hatais faru nein taka manta. Avó Laclubar prepara duni uma oan ida ho hadak au matak, didin ho tua tahan matak. To’o kalan boot, testemuña hosi fatin 2 Ma’abat Laclubar bá haree no avó Ma’abat hasan toos ona koalia ladi’ak, nune’e, avó Laclubar hakfodak hodi hasee ho lian galole hanesan Apati: Auwoh…! Amaretik Lin Taik Ba! (Amaretik Lian Laiha Ona), nune'e foho Maubere tenke metin nafatin, no Masin Balak Manatuto tenke tama ba Laclubar nia liman. Dadersan loromatan sa’e, avó Laclubar hamriik iha Maubere tutun hateke ba Manatuto hodi dehan ho lian Galole: Ga abrii nai huhun naon tun tasi, Naon batak ba masik lidar e taik, Naon batak ga masik sani e taik (ha’u hamriik hosi foho tutun hateke tuun tasi, haree to’ok ha’u-nia masin te’in ka lae, haree to’ok ha’u-nia masin nono ka lae).

Agrikutura

Xefe Suku Batara Tomás Pinto ho nia kriatividade no esforsu tomak, nia konsege harii Kooperativa Kafé ida ho naran “Wild Coffee of Maubere Mountain”. Kooperativa ne’e hamriik iha Associação Café Timor nia mahon. Ha’u konsege dadalia uitoan ho Xefe Suku Batara iha 23 de Dezembru tinan kotuk iha CCD, nia haktuir katak bainhira COVID-19 seidauk tama, kuaze kada semana vizitante sira bá hasoru nia no hakarak sa’e ba foho Maubere tutun hodi haree paizajen furak Maubere nian.

Aleinde foho Maubere, vizitante  sira mós hakarak vizita "Hospital Saúde Mental" ne’ebé lokalizadu iha suku Batara. Iha-ne’ebá bele kura moras mentál no TBC. Karik belun sira sente sintomas ruma bele hakat liubá hodi haree ho matan kaer ho liman._

Aikranik ida Manu-knuk ida (e.p 196)

Aikranik ida Manu-knuk ida

-

Loriku Lakateu hadoben malu

Aikranik ida be manu-knuk ida

Biar tempu Corona la ses malu

Hamutuk hadoben manu-knuk ida

-

Ha'u Abut Ha’u Rain Doben Timor (e.p 195)

Rai ki’ikoan ida iha mundu klaran
Rai ida úniku reziaun Ázia
Nia oan lemo rai lemo Tasi-balu
Sai hosi Timor lemo Tasi-sorin
 -
Timoroan rai li’ur keta haluha
Tinan ida dala-ida mai vizita fali
Sama netik ita rain sama ho domin
Hadomi ita rain liu rai seluk.
 -
Hanoin ita rain tau iha fuan
La’o lemo ema rain hanoin ita lisan
Lian tetun, ho tais, nu’udar kultura
Hametin haburas identidade ita-nian.
 -
Hanorin ita oan hatais Tais
Hanorin ita oan ko’alia Tetun
Hanorin ita oan múzika Tebe-tebe
Hadomi ita rain hosi rai dok.
 -
Lori ita-nia Lisan sai bá mundu
Lori hikas mundu seluk mai ita rain
Ita rain nu’udar aifunan buras
Aifunan buras sei dada ema mai.

-::-

Kmanek Loron Finadu (e.p 194)

Lahatene ohin kalan maluk iha-ne'ebé

Karik maluk iha foho ita hanesan 

Aban loron ita-nian vizita matebian

Maluk iha fatin seluk ha'u iha-ne'e

Filafali ba fatin fila ho kuidadu

Kmanek loron matebian ba maluk hotu.

-

Roda Tolu Zero Poluisaun (vídeo badak-I)

Transporte roda-3 ka ema toman bolu ho naran "ojek" iha munisípiu Manatuto ho nia totál purvolta-de 200. Motorista roda-3 nian halai livre buka pasajeiru tuir vontade, kada pasajeiru bele selu 25-50 séntimus. Haree ba estrada kapitál munisípiu nian ne’ebé klot hela entaun roda-3 sufisiente duni atu movimenta bamai ho livre hosi dadeer to’o lokraik molok tuku 9 kalan. Roda-3 sai mós nu’udar meius transporte ho zero poluisaun ne’ebé kria ka akontese uluk iha munisípiu Manatuto. Iha segunda semana hosi fulan Outubru 2020, ha’u ho oan feto halo viajen bá Manatuto ho bus Baucau nian, ami na’in-2 tun iha Monumentu dalan-fahen nian hodi kontinua halo viajen tama ba sidade laran sa’e fali roda-3 ne’ebé lian hanesan susuk maske nakék nakék uitoan maibé furak tanba halai ho kalma no zero poluisaun.

Hun Ida De’it Sanak Oioin (e.p 193)

 Hali hun Timor sanak oioin
Tahan tebar namahon furak be furak
Furak be furak fó matak malirin
Tebar be tebar hodi halibur nia oan.
-

Hali hun Timor sanak oioin
Tahan lemo rai seluk abut kaer metin
Abut kaer metin fó kbiit liután
Kbiit liután hodi metin ba oin.

-

Cesta Bázika (e.p 192)

Lansamentu Cesta Bázika - hahú Metinaro
Turu tun ba povu - la ho udan been
Esplikasaun klara - povu kompriende
Cesta Bázika nu'udar apoiu solidariedade

-

Nu'udar Lapis Rohan Ida (e.p 191)

Nu'udar Lapis Rohan Ida

-

Moris ne’e nu’udar Lapis rohan ida

Neineik sei mohu tubik to’o hotu

Neineik sei soe let ba rai.

Molok mate sei halo netik rai naran

Molok mohu sei hakerek netik buatruma

Hakerek netik hodi temi ó naran.

-

Rai Hau-nian Ha’u Moris Fatin (e.p 190)

Ó ha’e naroman furak mai ha’u
Ó ha’e lalenok ba vizaun
Ó ha’e furak ne’ebé ó fahe mai
Halekar ó domin no admirasaun 
-
Ó be haraik roman, hela di’ak ba
Hodi hakat liu bá loron foun seluk
Dadeer hadeer hikas, hosi moris ne’ebé dukur
Bainhira ó fó netik kalan hodi deskansa
-
Ó ha’e suavidade hosi solidaun
Bainhira kalan toba la dukur
Ó ha’e lalenok motivasaun dadeer nian
Ó luta tinan ba tinan la husik liu
 -
Ó-nia furak mosu mai, bainhira loromatan monu
Kor kmo’ok nian hosi ó-nia natureza
Ó ha’e esperansa, hosi biban loromatan sa’e
Ó sei hadeer hikas, hodi buka lialoos.
 -
Rai ne’e moris hosi Na’i domin na’in
Hakbiit ha’u la’o, monu hadeer, aprende, no sai boot
Ha’u-nia domin rohan laek ba ó Timor
Rai ha’u Rain, hosi ne’e mak ha’u moris.
 -
Hakoak oan sira, hodi tane ó
Halibur emar sira, hodi bali ó
Tane bali ó ho domin laran moos
Tula dikur ba malu sé bok ó.

~::~