Refujiadu '99 ha Cairui

21-9-99: Refujiadu '99 halo sorumutu iha akampamentu Mota ninin Cairui nian hodi kria mekanizmu ruma kona-ba distribuisaun aihán bainhira aviaun INTERFET hatún ho parakedas hosi loro-leten tun mai rai. Sorumutu ne'e lidera hosi Sr. Marcos Barique (Inaforek) ho tan lider komunitáriu balun. Sorumutu refere realiza depoizde INTERFET tun Dili iha loron 20-9-99.#

25-9-99: Ema boot sira sente duni sai refujiadu, enkuantu labarik sira sente fali hanesan eventu ba piknik. Ha'u ho Flávio (Asara) hamutuk ho labarik sira hariis hela iha mota Carui nian.#

16-9-99: Ami na'in-3, ha'u ho tiu Simião Ximenes Latiboe no tiu Asala hosi Wegaba bá buka aihán iha Cairui maibé la konsege hetan tanba populasaun Cairui ses hotu ba ailaran. Iha mota laran Lu-Amut ami hasoru malun ho kolega na’in-3 iha foto ne’e. Ami na’in-4 mesak FADOLA (Faluk Doben Laek), ami selfi lai molok fahe malu. Altura ne'ebá ami (ha'u, tiu Latiboe, tiu Asala) sei akampa iha Wegaba, enkuantu kolega na'in-3 ne'e ha'u lahatene sira-nia fatin akampamentu. Kolega na’in tolu ne’e mak joven ida se ha'u la sala nia hela iha Materaten Manatuto, ha'u, Jaime Baucau oan, no João Pequenino Laclubar oan ho naran fb mak pequinho Joao.#

30-08-99: Loron Konsulta Populár, bainhira ha'u vota hotu tiha iha Sentru Votasaun Aiteas (antigo SD II Manatuto), nu'udar local staff UNAMET ha'u hetan orientasaun hosi Mr. Moro hodi bá hein eskritóriu UNAMET, Aiteas (rezidénsia Sr. Hélio Miranda nian). Iha-ne'ebá, membru POLRI na'in-4 halo patrulla bá hamutuk ho ha'u hodi konversa halimar hodi hein to’o oras votasaun remata mak ami fahe malu. Kolega Albano (matebian) nu'udar sofér UN be kaer hela xapeo UN iha liman sorin hodi sadere iha airiin ne’e, nia mós to’o ikus halai bá Cairui.##

Komparasaun Badak Entre Vinte Quatro Anos Dahuluk no Daruak

1975 - 1999= 24 anos: (1) períodu integrasaun

1999 - 2023= 24 anos: (2) períodu independénsia

Períodu Integrasaun

Períodu integrasaun nakonu ho violénsia inklui kastigu, torturasaun no oho Timoroan hosi TNI Forsa Invazór rezime Soeharto nian. Hahú hosi jornalista Australiano  na’in-5 iha Balibo iha 1975 hodi loke dalan no odamatan ba sira-nia asaun violentu durante tinan 24 nia laran. Tan de'it asaun brutalidade TNI nian mak mosu fatin koñesidu balun ho naran: Jakarta Dua iha munisípiu Ainaro akontese simultáneamente hosi loron 26 de Fevereiro de 1976 to’o 1979, Insidente Marabia 10 de Junho 1980, Insidente Krarás Agostu 1983 iha munisípiu Viqueque, no Insidente Santa Cruz 12 Novembro 1991. Kontinuasaun hosi insidente hirak iha leten, Forsa Indonéziu kaptura Timoroan hirak ne’ebé deskonfia kontribui ba prosesu klandestina (Orang Berkepala Dua) hodi bá kastigu nu'udar Prizoneiru Polítiku (Tahanan Politik), oho no balun lakon la hetan informasaun to’o ohin loron. Maske nune’e, dezenvolvimentu be Indonézia harii, harii daudaun, no oho ema mós, oho daudaun. Tanba ida-ne’e mak sentimentu Ódiu no Anti hosi Timoroan sira hahú moris buras to’o tempu oportunu ida mak Timoroan sira hamriik ho aten brani haklalak hodi kontra Rezime Soeharto nian no konsege lori Timoroan ba Konsulta Popular 30 Agosto Noventa Nove nu'udar desizaun hosi prezidente Habibie hodi loke Opsaun Rua mak "Simu Autonomía no Rezeita Autonomía" (2 opsi: menerima Otonomi dan menolak Otonomi).

Konsekuénsia hosi Konsulta Populár

Indonézia tenke hakat sai husik hela Timor-Leste nu'udar konsekuénsia hosi Konsulta Populár 30-8-99, no 4-9-99 nu'udar loron rezultad finál Konsulta Populár nian ne’ebé anúnsia diretamente hosi Sekretáriu Jerál Organizasaun Nasoens Unidas Kofi Anan hosi Nova Iorke ne’ebé hatudu katak: 94.388 mak hili autonomía enkuantu 344.580 mak rezeita autonomía, no rezultadu refere korresponde ba 21,50% kontra 78,50% hosi 450.000 votantes rejistadu, no votus válidu mak 438.968. Ho nune’e Indonéziu tenke fila kotuk bá daudaun husik hela Timoroan ne’ebé moris hela ho matabeen, ho sofrimentu no tristeza durante tinan 24 nia laran. 

Períodu Independénsia

Períodu independénsia hahú iha 1999 depoizde Konsulta Populár, no Organizasaun Nasoens Unidas (ONU) sei tau-matan liuhosi misaun UNTAET (United Nations Transitional Administration for Timor-Leste) nu'udar períodu tranzitóriu 1 durante tinan 2 ho balu, hafoin ONU fó podér ba Timoroan hodi proklama nia loron Restaurasaun ne'ebé monu iha 20 de Maio de 2002. Nune’e, Bainhira ita sura hosi 1999 to’o agora hamutuk tinan 24 ona, maibé ita-nia dezenvolvimentu sei hakdasak kompara ho períodu integrasaun. Ida-ne'e, haree hosi ókulu povu ki’ik nian katak Ulun Boot sira mak la rona malu, laiha boa vontade atu tur hamutuk, hodi kria mekanizmu ida be di’akliu hodi dezenvolve país doben ida-ne'e. Ita hein katak bele akontese mudansa ruma, atu ita keta hakdasak nafatin maibé bele hakat liu ba oin nu'udar rai selu-seluk iha mundu._

Onze de Agosto Abut Funu Nian (e.p 222)

(i)
Loron Onze de Agosto Setenta Cinco
Funu foun nakfera kapitál Dili
Hahú loke Timoroan tomak nia hanoin
Hahú hanorin Timoroan sai aten brani
(ii) 
Hanorin hatudu tátiku funu nian
Hatudu mós atu hasoru inimigu
Maun alin, alin maun oho rasik malu
Kilat tutun se ba malu, sé ta’uk sé.
(iii) 
Loron Onze de Agosto, hahú funu
Povu ki’ik hakfodak ba istória foun
Istória ran fakar, hosi UDT
Liu tiha loron 9 FRETILIN fó resposta.
(iv)
 FRETILIN responde harii FALINTIL
Maun alin, alin maun sai ida de'it
Sai ida de'it, tula dikur ba malu
Atu mate ka moris, ukun rasik-an!
~::~

Na'i Perdua Ha'u (e.p 221)

Ha'u ema maksalak - sala liu ona

Kontra liu ona - doutrina Na'i nian

Kontra liu ona - ukun fuan sira

La halo tuir -  Na'i nia futarlia

Atan ha'u bambori - halo liu ona

Nu'udar sala-na’in - hakat liu tiha.

-

Deskulpa mós ba doben,

Ibun ruma sala karik - perdua ha'u

Hahalok ruma kle’uk karik - perdua ha'u

Hosi ohin bá oin - la tutan ona

Hosi ohin bá oin - hakribi ona

Hakribi ona - atu la halo tan

Hakribi ona - atu la tenik resik

Deskulpa Na'i! Deskulpa doben!

~::~

Ita-nia Mate Sei La Folin (e.p 220)

(i)

Ita ema sei mate, loron no oras marka tiha ona

Iha mundu ita hotu nu'udar bainaka

Iha mundu ita hotu ema la'orai

Bainhira Na'i bolu, sei la tenik tan buat ida

 La lori kohe-mama, tabaku no bua malus.

 (ii)

Bainhira ha'u mate, lalika haloot ba kaixaun karun

Lalika hatais roupa furak, hodi latan iha rai okos

Kaixaun karun, roupa furak, sei nakfilak sai rai metan

Aifunan masa aifunan freska, sei nabeen namlaik iha rate leten

Ema nian sosa karun, ha'u-nian baratu lerek tuir ita kbiit.

(iii)

Lalika sunu lilin boot, satán lampu kristál iha rate leten

Interese liu mak orasaun akompaña ha'u-nia klamar

Orasaun badak de'it, lalika naruk no funan-funan

Ha'u na'in sei hatán iha Na'i nia futar oin

Iha Reinu Lalehan, Reinu Glória Bendita nian.

 (iv)

Tempu finadu, lalika lori aifunan oioin bá vizita ha'u 

Lalika reza ho intensaun, atu tulun ha'u-nia klamar

Na'i mak fó moris mai ha'u, ha'u klamar sei halo rasik

Família sei se matebian ho aihán, na’an no tua

Hasa’e orasaun, han hemu temi ami naran.

 (v)

Lalika hafutar ho koroa kmo’ok

Bahat lerek letra ida "Aqui Jaz "iha kruz lolon

Parente balun le karik ha'u makne’e,

Nu'udar matebian ha'u la le ona

La le, la haree imi-nia vizita.

 (vi)

Sé mak hakarak fó onra, prezente ho aifunan morin

Haruka kedas bainhira ha'u sei moris,

Bainhira ha'u mate sei la sente, la horon ona

La haree saida be imi halo

La rona saida be imi katak.

 (vii)

Lalika bá vizita ha'u-nia rate,

Iha rate nia klaran sei la hetan malu

Bainhira sei moris vizita kedas malu

Vizita malu hodi dada lia uitoan

Dada lia hamutuk konta istória. 

 (viii)

Bainhira hasoru malu, ita sei haksolok

Ita bele hateke malu, oin-ho-oin

Kaer liman hamutuk, hodi ko’alia

Lok netik tabaku ho bua malus

Kafé tanan xikra ida, ita-nian nanis.

~::~

Koopera Hamutuk Halo Limpeza (e.p 219)

(i)

Lixu ne’e sé nian, halibur hosi sé - mai hosi sé

Fo’er ne’e sé nian - tansá la soe tuir nia fatin

Karreta lixu nian - suru labele

Suru ohin moos tiha - aban butuk fali.

 (ii)

Ita hotu nu'udar - membru komunitáriu

Tau matan hamutuk - halibur lixu

Hadomi ambiente - hahii fatin moos

Ambiente sai moos - moris saudavel.

(iii)

Kaixa mamuk - aqua mamuk namkari lurón ninin

Liubá liumai - finji la haree

Oinsá kontribui - sai fatin moos

Oinsá evita - soe arbiru.

(iv) 

Kapitál nia oin - tenke sai kmo'ok

Kapitál nia futar - la'ós lixu

Ema boot fahe orden - ki'ik kontribui

Koopera hamutuk - halo limpeza.

~::~

Aihán Timur nian (e.p218)

(i)

Aihán lokál rai ne'e nian

Matabixu aifarina e talas da’an

Kafé manas xikra ida hodi hamaluk

La haluha hatúr masin ho aimanas.

(ii)

Moris iha sidade diferensa duni

Matabixu paun maran, keju eh manteiga

Kafé manas, xá manas, susubeen, tuir ita gostu

Matabixu remata, tabaku lulun ida dada hodi taka.

(iii)

Ida-ne'e baibain moris Timur nian

Atu di'ak ka lae ita-nian nanis

Aihán rai laran loron bainlet

Tama fali ba festa aihán estranjeiru

Tua-mutin tua-sabu loron bainlet

Tama to'ok ba festa tintu ho serveja.

(iv)

Hadomi aihán lokál, hadi'a saúde

Habelar aihán lokál hasa'e rendimentu

Depende natoon ba aihán rai li'ur

Konsumu ita-nian, livre hosi moras.

~::~

Mina Maran Mor (e.p 217)

Mina maran karik ba
Ita rua nia domin buras nafatin.
Biar ha'u la bá tula
kontaktu ita-nian tula nafatin. 
Domin buras nafatin hodi hetan biban
Kontaktu tula nafatin hodi hein oras.
~::~

Loromatan Besik Mout (e.p 216)

Loron besik mout ona, 

fulan atu sa’e fali

Rai atu nakukun, 

tama ba kalan

Avó feto kaer knaar 

iha knua seluk

Avó mane katuas ona, 

deskansa lai. 

-

Avó mane matan kro'at, 

oin  moris, liman badaen

Kaer knaar hakat koko, 

lamas fatin mamar

Beioan hamriik titu hein hela

Avó sente kole karik, kasu ba beioan.

~::~

Tone Tuir Dalan (e.p 215)

Knananuk foun melodía furak

Sentidu furak, ton be kmanek

Nu'udar knananuk ita sei rona

Rona hodi hananu hodi banati.

 -

Nu'udar kantiga ita sei simu

Simu hodi sukat be rona hodi tetu

Laran monu karik be ita sei tuir

Tone tuir liuhosi dalan loos nian.

~::~

Eklipse Domin (e.p 214)

Kleur tebes duni ha'u hein ó

Kleur tebes duni hakarak hetan ó

Hakarak duni atu hasoru ó

Ansi loos an atu hetan ó oin.

-

Loron ida ohin lahanesan baibain

Wain ida ohin ó haksumik mai ha'u

Ó halo ha'u laran susar let

Ó-nia lalatak de'it ha'u lahetan.

-

Teki-tekir ó mosu neineik mai

Teki-tekir lalatak tubir sai mai

Ó mosu tomak mai ho roman foun

Ó mosu hikas ho esperansa domin nian.

~::~

HINO VETERANOS

Hino Veteranos ba loron 3 de Março

(i)

Três de Março data indelével

Que marcou o renascer da esperança

Três de Março Compromisso e juramento

Sob  os ossos dos herois já tombados. x2

-

reff:

Avante companheiros avante!!!

Erguida em sangue a bandeira da nação

Perante o povo e perante o mundo

Pela Pátria firmeza a convicção

Perante o povo e perante o mundo

Pela Pátria firmeza a convicção. x2

-

(ii)

Três de Março prepetuar-se-á

P’las gerações vindouras a memória

Em defesa da complete soberania

Vamos unir forças para a vitória. x2

-

Hakat ba reff…. tama to'o finál

======================

Títulu Múzika: Hino Veteranos

Letra orijinál: Xanana Gusmão

Múzika: Berliku

Vogais (vocal): Berliku ho Martinho

Arranju (arrangement): José Faria, Lian-Fundu (membru banda)

Knananuk ne’e kria depoizde Konferénsia FRETILIN iha Lalini, Lacluta, Viqueque iha tinan 1981 hodi reorganiza rezisténsia (depoizde Operasi Kikis '81 remata)

Knananuk (Hino Veteranus) ne’e dedika ba Veteranus ne’ebé aban dia 3 de Marcço komemora sira-nia loron. Viva Veteranus!!!

Tan De'it Gostu Simu Aljema (e.p 213)

(i)

Ó hafo'er let ó-nia banin nia oin

Ó hatún let ó-nia banin nia fama

Ó-nia asaun ema hakribi

Ó-nia hahalok ema fó merese.

(ii)

Ó hafo'er let ó-nia káben nia oin

Ó hatún let ó-nia káben nia fama

Ó-nia asaun hamoe ó-nia káben

Ó-nia hahalok ó-nia káben fuan moras.

(iii)

Iha grilu nia knuk iha fukun barak

Lohitén, bobartén, violadór, subar iha grilu nia knuk.

Ó subar metin mós sei nakloke

Sei nakloke hodi leno ba ema hotu. 

(iv)

Ó simu aljema tan ó-nia gostu

Submete ba lei tan ó-nia gostu.

Tan ó-nia gostu prega aljema

Molok basa rentós metin tiha ona. 

~::~

Na'i, Para Ona Ba (e.p 212)

(i)

Oho malu, sona malu, tá malu iha kintu kantu

Ha'u laran taridu, ha'u fuan ki’i

La'o iha lurón, isin makés

Isin makes ba problema foin mosu

 (ii)

Hahalok at ne’e mosu teki-tekir

Teki-tekir mosu sa’e iha kapitál

Ukun na’in kaer orden keta matan dukur

Keta husik lurón - mamuk iha kalan

 (iii)

Ukun na’in kaer orden, tau matan ba

Halo netik movimentu, iha bairru laran

Proteje netik ami, iha tempu susar

Fó netik konfiansa - mai povu ki’ik.

Na'i, para ona ba!

~::~ 

 

Kesi Metin Nafatin Ha'u-nia Bandeira (e.p 211)

(i)

Bandeirolas mean kinur metan no mutin

Kor kmo’ok bandeira Rai doben nian

Harii kintu-kantu tuir dalan ninin

Festeza loron boot ukun-an nian

(ii) 

Balun kesi ba karreta no motorizada

Ne’e mak estilus povu ki’ik nian

Karreta plat-G lahanoin kona

La hanoin laliga kesi bandeira

(iii)

La hanoin netik atu kesi bandeira

Ne’e maka estilus ema boot nian

Ema ki’ik espresa tuir dalan simples 

Hahii hadomi ha'u-nia bandeira

(iv)

Mean kinur tama tan metan no mutin

Símbolu aten-barani no funu-na’in

Laran moos no domin, ba pátria doben

Dignidade nasaun foun, mundu rai klaran.

~::~

Oras Loro-Bubur (e.p 210)

Oras loro-bubur 

-

Oras loro-bubur to’os la Lere

Tua midar furin mutin suli tun Ramu

Ha'u Lolo liman koko daudaun

Koko daudaun hodi halakon hamrook

 -

Tuamutin rai-na’in tua saborozu

Karik sente laran kmaan mai koko rasik

Koko uitoan iha oras loro-bubur

Hemu natoon kuidadu baku-fila.

~::~

Koitadu Merkadu Manleuana (e.p 209)

      Koitadu Merkadu Manleuna

Suar metan falun Merkadu Manleuana

Ahi funan no latun semo loro-leten

Povu fila-liman hakfodak laran moras

Vendedor barak mak lakon sasán.

 -

Akontesimentu segunda dadersan

Loron Valentine tuir lolos atu haksolok

Derrepente ahi lamas merkadu sein alerta

Iha biban ne’ebé foin hadeer bok-an.

~::~

Na'i Matan Badaen (e.p 208)

(i)

Ha'u hetan moras ida - todan tebe-tebes

Aimoruk oioin - ha'u koko ona

Aikulit, aitahan - koko hotu ona

Koko hotu tiha - rezultadu laek

(ii)

Hori bainrua - konsulta iha klínika

Doutór pasa bodik reseita - rua mai ha'u

Tenke hasai ran - leno rai-xis (x-ray)

Teste rua la deteta - moras ha'u-nian

(iii)

Ha'u koko husu fali - matandook sira

Matandook haruka - husu misa matebian

Matandook ida fali - uma-lisan naksalak

Matandook seluk - ema ruma hanoin at

(iv)

Na'i aman Lalehan - boot-liu hotu

Atan ha'u saran loos - fiar ba sé?

Atan ha'u hetan loos - dalan husi bé?

Na'i aman Laran Luak - sei loke dalan.

(v)

Kmanek loron domingu - ba belun hotu

Tabe hela ba maluk - pasiente sira

Badinas hemu aimoruk - hodi rekupera

Orasaun  família nian - sempre akompaña

~∷~

 

Tabaku Nia Kutun Bele Oho Ema (e.p 207)

Maluk, ó sei fuma karik - rona lai mai

Ha'u jura ba an - ha'u para ona

Ha'u tur mesa-mesak - hodi hanoin

Tabaku sut suar - folin laiha

-

Ó sunu lolon ida - sunu ó osan

Ó sunu lolon ida - sunu  saúde

Ó sei fuma karik - rona mós mai 

Ha'u jura ba an - ha'u taka ona. 

-

Maluk, ó fuma hela karik - rona lai mai

Ita-nia tabaku - folin sa’e tan

Folin sa’e tan - fó lisaun mai ita

Lisaun furak - atu hadomi saúde. 

~::~

Hakarak Liu Sai Patraun (e.p 206)

(i)

Ulun moruk hakarak de'it manán

Manobra tun-sa’e buka hela votus

La rona malu la fiar maun-alin

Promesa funan buras hakat liu dalan

(ii)

Hakarak de'it sai maun boot

Lakohi hamutuk ho ema ki’ikoan

Hakarak liu sai patraun

Lakohi hamutuk aileba oan

(iii)

Maukobak tun-sa’e finji oin mamar

Oin mamar ba emar buka konfiansa

Konfiansa simu tiha haluha promesa

Abuza konfiansa lakon esperansa.

~::~