Ahi han rai ne'e sé mak sala
Ahi han merkadu ne'e sé mak kulpa
Kuĺpa ne'e mai hosi loos nebé
Sala ne'e mosu mai loos hosi sé.
Funan mean teki-tekir halo hakfodak
Suar metan teki-tekir falun merkadu.
Merkadu hira ona mak ahi lamas
Basar fatin hira ona mak ahi tolan
Mai ita hotu simu realidade moruk ne'e
Mai ita hotu simu naha todan ne'e.
Naha todan hanehan susar mai ita
Naha todan hamonu ita matanbeen.
--- o0o ---
Nota:
Hahú hosi tempu okupasaun Indonézia to'o URA, laiha merkadu ida mak livre hosi dezastre inséndiu. Sura hosi Pasar Senggol Bidau, Merkadu Antigu atual CCD, merkadu Manleuana, merkadu Becora, to'o merkadu Taibesi ne'ebé ahi-han dala-3 ona.
Nu'udar poeta, espiritualmente ha'u sente envolvidu iha dezastre ne'e. Tan-ne'e, husu ba autoridade kompetente tenke halo jestaun di'ak hodi evita dezastre keta tenik tan.#
