Foho Leten Badiin (e.p 138)

Foho Leten Badiin

Ha’u sa’e bá foho leten

Ha’u hakarak haree foho nia furak

Hakarak haree no koalia mesmesak

Mesmesak ho natureza iha rai badiin

Hateke sa’e ba loro-leten

Ha’u la hetan buat ida

Hetan deit kalohan mutin moos...
Forma an nu’udar veo no kabasrahun

Bainhira ha’u to’o iha foho leten

Biban furak ida maho-been seidauk maran

Rona ema ida koalia mai ha’u

Ó lalika ta’uk!

Ha’u to’o iha ne’ebá

Ha’u latan kedas an ba duut leten,

Buat sira-ne’e mesak mehi hotu de’it...

Teki-tekir ha’u hakfodak, hadeer hanoin tebes?

Mehi sa’e foho leten

Mesmesak hamnasa ho natureza iha rai badiin

Hateke loro-leten hetan veo mutin

Hateke tun, hetan laloran tasi.

Ha’u la koñese buat hotu-hotu

Ha’u la hatene buat ida

Ha’u hakarak sa’e ba leten liu

Laiha ona dalan mai ha’u

Ha’u hateke ba sorin

Ha’u haree hetan dalan ki'ikoan ida

Ha’u rona lian ida dehan mai ha’u

Ó keta sa’e mesmesak!

Ha’u hanoin kedas to’o dala-rua

Ha’u lakohi foti risku

Risku boot ruma iha tutun ne’ebá

Di’ak-liu hakmatek ho livre iha fatin ne’e

Loromatan helikses ha’u liuhosi an ba veo ho kabasrahun mutin

Ha’u hanoin atu tun kedas

Sente ta’uk mós naresin

Kanoruk boot, isin fulun hamriik, liman ain nakdedar

Kanoruk boot ta’uk naresin

Ha’u haree hetan fatuk lolon hanesan eskada

Ha’u kaer ba ai-abut, tun neneik hosi eskada ne’e

Ha’u hetan kedas buat ne’ebé ha’u buka…

          …       

Knua Istórika (e.p 137)

Knua Istórika

Knua murak oan ne’e, knuk horik fatin

Fatin furak oan ne’e, halibur matan

Bele kiak karik ba, knua ha’u-nian

Iha susar nia laran, knua ita-nian

Ema barak halai, husik hela ó

Ema barak haksoit, ses hela ó

Husik ó ba kotuk, buka dalan foun

Ses ó ba sorin, buka is foun

Dalan foun la hetan, filafali mai

Is foun la sente, filafali mai

Filafali mai, ita rua hamutuk

Ita rua neon ida, laran ida de’it

Hadeer rai hun mutin ona mai

Hadeer loro foun sa’e ona mai

Hanoin hamutuk laran ida de’it

Loron doze-de-Maiu Kuda Rin Haat!.

...

Lala’ok Domin nian (e.p 136)

Lala’ok Domin nian

Hosi o-nia fuk ha’u haree anin tasi

Hosi ó-nia isin ha’u horon tasi is
Ha’u la presiza ó-nia beiju mai ha'u,

Ha’u hakarak liu ó hakoak ha’u
Ha’u la hananu tanba ha’u la hatene

Karik ha’u hatene, ha’u sei hananu ba ó melodia furak

Knananuk dadolin iha ha’u-nia moris.

Hosi tempu ba tempu, ha’u sala dalan

Dalan bobar durante ha’u-nia viajen
Ha’u bobar demais, buka aifunan ne’ebé lakon
Ha’u sente la sama rai, namlele iha rai-leten
Hosi matabeen be ha’u haree hetan

Hosi oin be kamutis maibé moris
Ha’u rai lembransa mehi moris nian.

Keta obriga ha’u atu para hadomi

Ha’u hakarak liu ó bolu ha’u-nia naran
Ha’u sei iha biban, ó labele oho ha’u an tomak
Ó halo lai knananuk ida mai ha’u

Knananuk melodia ne’ebé perfeita
Labele husik ha’u mesak biban rohan ida

Tuir netik ha’u liuhosi raihenek leten
To’o ikus, ha’u sei hetan rasik dadolin murak ho perfeita 
Lahatene loos iha-ne’e ka iha mundu ne’ebá.

…
(foto kortezia internet)