Hakaran Ha'u-Nian (e.p 134)

Hakaran Ha'u-Nian

Ha’u hakarak hariis udan
Ha’u hakarak horon morin natureza nian
Ha’u hakarak ain tanan sama rai leten
Ha’u hakarak bee suli duni hosi bee-matan
Ha’u hakarak horon mós aifunan morin
Borboleta semo hadulas, maña an ba malu
Bani sira semo hananu ho lian baixu
Nehek no karakól dolar bamai
Ida-idak tuir nia dalan.

Ha’u hakarak sui fali fuk ho sasuit karau dikur
Ha’u hakarak hatais kamiza o.b. ida
Bolsa naklés no folin laek
Ha’u hakarak haree fali labarik sira tebe 'jambua okir'
Labarik sira haksoit borraxa ho haksolok
Tiru berlindis no hana kaleik
Ha’u hakarak haksolok no hamnasa tuir sira
Ha’u hakarak mós rona lian hakilar
Lian hakilar ne’ebé furak la sura
Furak naresin hosi ema bé sente riku loos ona.
-o0o-

Koko Hatene Xina Lian (e.p 133)

Koko Hatene Xina Lian

-

Mai ita aprende ko’alia Xina lian 
Ó di’ak ka lae: “nǐ hǎo ma” 
Ha’u di'ak hela: “wǒ hěn hǎo” 
Ha’u hadomi ó dehan: “wǒ ài nǐ” 
Ó hadomi ha’u dehan: “nǐ ài wǒ” 
Fó obrigadu ba dehan: “xiè xiè”

Ema Jinjang ko'alia Tetun la moos

Pronúnsia Tetun tuir nia dalen

“Koreka hakala sosa saira”

Ne’e katak: kolega hakarak sosa saida

Loke ita tilun koko kumpriende

Nia ko’alia hanesan han etu manas.

-o0o-

Domin Rohan Laek (e.p 132)

Domin Rohan Laek

Oan Mane mau-mesak la’o lemorai
Hetan Noi bimesak domin dokorai
Família hamutuk dudu ba oin
Sinu Igreja dere lian domin rohan laek.

-

Nota:Poema ne’e hakerek no publika ona iha facebook iha loron 10 Outubru 2016

Kadoras Rai Leten (e.p 131)

Kadoras Rai Leten

Udan tau segidu, semana ida laran

Konsumidór bee-moos, tau neon ba udan

Udan turu ba kakuluk, suli mai bidón

Suli mai bidón nakfilak bee-hemu,

Fase bikan, hariis, fase mós roupa.

Kadoras bee-moos, dada laran mamuk

Povu ki’ik tau neon, tau saugati

Tau lerek neon ba kadoras rai leten

Kadoras rai leten, muta sala bee merak.

Muta sala bee merak, bá povu kbiit laek

Kbiit laek simu merak, simu ho halerik

Halerik daudaun susar daudaun

Hetok tan halerik susar liután.

Kadoras rai leten dada Sá susar?

La xupa bee moos, xupa bee merak,  

Kadoras tasi okos dada ho Sá?

Kuidadu horut sala, horut tasi been.

~o0o~

Ha’u Rain Doben (e.p 130)

Rai tubik oan ida mundu rai klaran

Naran morin lemorai, tuir ai-kameli.

Isin toos, la nakdoko tuir fatuk mármer

Fatuk isin, fatuk bokur murak rai doben.

Latan-an hakmatek, tuir ai-knanoik

Ai-knanoik beiala bei lafaek.

Bei lafaek matadalan, abut rai doben

Bei lafaek identidade, ilas Timor nian.

Ema barak mak terus tan de’it ó

Padese tan ó mate tan ó.

Mate tan ó, hodi buka dalan loos

Dalan loos ida de’it ukun rasik-an.

Rikusoin ó-nian, butuk rai okos

Rai okos nakonu, suli tun tasi.

Nalihun tasi okos sai minarai

Minarai naran boot loke mundu matan.

Mundu matan nakloke mosu interese

Satan da’et ‘kadoras’ hakur tasi-balu.

Tasi-balu lolo liman xupa daudaun

Loke matan naklosu xupa daudaun.

~.~

Ba Ó Veteranu (e.p129)

 Ba Ó Veteranu

Oan mane maukiak mate funu laran

Inan feton aifunan mate hein uma

Ó mane ha’u mane sé ta’uk sé

Kilat tutun se malu sé ta’uk sé

Veteranus nu’udar restu funu nian

Veteranus nu’udar sasin ba istória

Istória hakerek ran no ruin

Ran no ruin hakur tama vitória

Vitória loos ona luta kontinua

Kumu liman nafatin luta kontinua!

~oOo~

Telemovel Modernu (e.p 128)

Telemovel Modernu

Para lai kose-kose, fihir lai mai

Ita-rua tesi-lia hanesan kolega, nu’udar belun

Hateke mai ha’u, oin-mamar uitoan ita dadalia

Ó kaer mesak nia, ó lamas bamai bele matandukur

Hamnasa mesmesak hanesan bulak

Ko’alia mesmesak nu’udar fulan-lotuk

Tansá la taka uitoan, deskansa lai?

Husik nia malirin livre uitoan!

Ita-rua dadalia, konta ho istória sei furak liu

Istória antiga, tama tan komik ruma

Piska matan dala-ida hamnasa tiha

Hamnasa hahaek, korrente amizade metin liután.

- oOo-