(i)
Moris ne'e nu'udar ema la'orai
Bainhira to'o rohan - fila la despede
Iha mundu halo tuir - Na'i nia doutrina
Hadomi Na'i - liu sasán hotu-hotu
Hadomi ema seluk - nu'u an rasik
(ii)
Nu'u membru komunidade - sei tulun malu
Tulun malun hamutuk - nu'u maun alin
Maun alin barak - la garante tulun malu
Balu tulun de'it - mak sira-nia kolega
Kolega hodi gava - belun laran luak
(iii)
Família balun tulun duni - tuir sira kbiit
Uitoan ka barak - tulun tuir kbiit
Mosu susar nabanaban - aumenta tan dívida
Ke'e ku'ak iha-ne'e - taka iha ne'ebá
Taka iha-ne'ebá - ke'e foun fali
Hosi fulan to'o tinan - taka la nahas.
(iv)
Husu tulun ba maun - maun mós susar
Menas tan ba alin - alin kredit hela
Roda mundu nian - ladauk dulas kona
Loromatan nia roman - hakat liu tiha
Bainhira hakat kona - sei leno tun mai
Leno bodik mai ita - lori is foun.
~::~
No comments:
Post a Comment