Na'i, Lou, no Atan

Liafuan Na'i ita só bele uza hodi temi Na'i Maromak, Na'i Jesus/ Na'i Lulik no Lou Madre sira, labele uza ba Na'i PR ka Na'i PM, basá  Timor-Leste ne'e nasaun demokrátiku no la'ós nasaun monarkía ne'ebé ita laiha ona Liurai laiha ona Atan. Defaktu liafuan Na'i sei bele tradús ba Señór maibé tuir kontextu Timoroan nian, Atan sempre iha Na'i no Lou nia okos. Maibé ikus ne'e povu sei uza liafuan Na'i hodi bolu Na'i Xefe Suku sira, nst., tanba sei hetan hela influénsia hosi períodu malae mutin nian, ne'ebé tuir loloos hotu ona hosi tinan 1975 nian.

Bainhira Indonézia tama mai hahú tempu ne'ebá ita bolu ona malu nu'udar bapak ibu beserta saudara saudari. Iha 1999 bapak ibu dan saudara saudari bá ona mota sorin, ita filafali ba maun-alin, alin-maun nu'udar onu, nu'u onu rani'a sikun ba malu.

Ita tenke haketak períodu malae mutin nian durante tinan atus-4 resin  (biban ne'ebé buras ba Na'i no Atan), no períodu okupasaun Indonézia tinan ruanulu resin-4 (kita sudah sama-sama), no oras-ne'e ita ukun-an ona ba tinan 24 hodi halakon ona Na'i no Atan, hamoos ona ibu dan bapak hodi hakat fali ba señór no señora hosi rai ulun to'o rai ikun, hosi tasi feto to'o tasi mane, ita mesak maun-alin rai ida de'it. Lalika temi tan lia uluk nian, basá lia ulu oin ida, ikus oin ida, lalori lia uluk sukat lia ikus._