Tuesday, March 13, 2018

Kadoras Rai Leten (e.p 131)


Kadoras Rai Leten

Udan tau segidu, semana ida laran
Konsumidór bee-moos, tau neon ba udan
Udan turu ba kakuluk, suli mai bidón
Suli mai bidón nakfilak bee-hemu,
Fase bikan, hariis, fase mós roupa.

Kadoras bee-moos, dada laran mamuk
Povu ki’ik tau neon, tau saugati
Tau lerek neon ba kadoras rai leten
Kadoras rai leten, muta sala bee merak.

Muta sala bee merak, bá povu kbiit laek
Kbiit laek simu merak, simu ho halerik
Halerik daudaun susar daudaun
Hetok tan halerik susar liután.

Kadoras rai leten dada Sá susar?
La xupa bee moos, xupa bee merak,  
Kadoras tasi okos dada ho Sá?
Kuidadu horut sala, horut tasi been.
~o0o~

Monday, March 5, 2018

Ha’u Rain Doben (e.p 130)

Rai tubik oan ida mundu rai klaran
Naran morin lemorai, tuir ai-kameli.
Isin toos, la nakdoko tuir fatuk mármer
Fatuk isin, fatuk bokur murak rai doben.

Latan-an hakmatek, tuir ai-knanoik
Ai-knanoik beiala bei lafaek.
Bei lafaek matadalan, abut rai doben
Bei lafaek identidade, ilas Timor nian.

Ema barak mak terus tan de’it ó
Padese tan ó mate tan ó.
Mate tan ó, hodi buka dalan loos
Dalan loos ida de’it ukun rasik-an.

Rikusoin ó-nian, butuk rai okos
Rai okos nakonu, suli tun tasi.
Nalihun tasi okos sai minarai
Minarai naran boot loke mundu matan.

Mundu matan nakloke mosu interese
Satan da’et ‘kadoras’ hakur tasi-balu.
Tasi-balu lolo liman xupa daudaun
Loke matan naklosu xupa daudaun.
~.~

Saturday, March 3, 2018

Ba Ó Veteranu (e.p129)


 Ba Ó Veteranu

Oan mane maukiak mate funu laran
Inan feton aifunan mate hein uma

Ó mane ha’u mane sé ta’uk sé
Kilat tutun se malu sé ta’uk sé

Veteranus nu’udar restu funu nian
Veteranus nu’udar sasin ba istória

Istória hakerek ran no ruin
Ran no ruin hakur tama vitória

Vitória loos ona luta kontinua
Kumu liman nafatin luta kontinua!
~oOo~

Wednesday, February 21, 2018

Telemovel Modernu (e.p 128)


Telemovel Modernu

Para lai kose-kose, fihir lai mai
Ita-rua tesi-lia hanesan kolega, nu’udar belun
Hateke mai ha’u, oin-mamar uitoan ita dadalia
Ó kaer mesak nia, ó lamas bamai bele matandukur

Hamnasa mesmesak hanesan bulak
Ko’alia mesmesak nu’udar fulan-lotuk
Tansá la taka uitoan, deskansa lai?
Husik nia malirin livre uitoan!

Ita-rua dadalia, konta ho istória sei furak liu
Istória antiga, tama tan komik ruma
Piska matan dala-ida hamnasa tiha
Hamnasa hahaek, korrente amizade metin liután.
- oOo-

Friday, February 2, 2018

Mai ita hanoin lisuk

Situasaun  polítika ohin loron iha TL hanesan loloos ho polítika '75 nian, bainhira iha biban ne’ebá eziste partidu ki’ik 2 (Kota & Trabalhista) plus partidu boot 3 (UDT, Apodeti, Fretilin). Partidu ki’ik rua ladún iha militante, UDT-Apodeti lakohi UKUN-An, Fretilin mak partidu úniku ne’ebé defende UKUN-An. Bainhira UDT hahú hamoris golpe iha 11 de Agosto 75, Fretilin mós hahú harii FALINTIL hodi responde ba golpe iha 20 de Agosto 75, tiru-malu manas liután iha Dili laran, entaun lider UDT&Apodeti sira barak mak halai ba Indonézia via Mota-ain. UDT-Apodeti bá husu Indonézia hodi mai invade Timor. Fretilin sente ameasadu, entaun Fretilin hahú proklama Independénsia unilateralmente iha 28-11-75. Liu de’it loron sia nia laran, iha 7-12-75 Tropa Indonéziu ho Partisan timoroan ne’ebé anti Fretilin tama iha Dili. Fretilin mantein nia pozisaun, halai ba ai-laran hodi defende UKUN-An no rejiste nafatin durante tinan 24 nia laran. Militár Indonéziu nian hamutuk ho lider UDT-APODETI sira hahú deskreve Fretilin ho liafuan GPK (Gerombolan Pengacau Keamanan [Grupu Perturbadór Seguransa]). Populasaun hosi distritu mai Dili tenke lori SURAT JALAN (Guia da Marcha), sé mak la lori Surat Jalan sei konsidera nu’udar “orang berkepala dua”, GPK / Fretilin etc. Sira hakarak troka naran Fretilin ho liafuan GPK hodi hatudu ba mundu katak Fretilin la eziste ona, só eziste de’it mak GPK. Sira hanorin povu oinsá atu anti ba Fretilín.   

Maluk doben sira,
Ohin loron ita UKUN-An ona, situasaun polítika hanesan nafatin ho '75, ho ambisaun polítika ne’ebé boot demais, obriga partidu polítiku seluk atu anti nafatin ba Fretilín. Nu’udar ita haree ba istória 75 nian, UDT-APODETI mak anti Fretilin; entre '76-'99, UDT-APODETI nu’udar integrasionista ne’ebé bá bolu Indonéziu mai invade TL aumenta liután anti ba Fretilin tanba haree klandestinu oan sira-nia atividade anti Indonéziu nian. Ohin loron UKUN-AN ona mós partidu hirak-ne’ebé sikat ho ex Oportunista/ex Autonomista sira kria nafatin imajen anti ba Fretilin ho nia lideransa sira. Bainhira loos mak bele iha kompetisaun ne’ebé saudavel entre militante ho militante, no entre partidu ho partidu, no bainhira bele halakon linguajen ne’ebé la apropriada, bainhira loos mak ema ki’ik bele respeita lideransa liuliu lider istórika sira. Pergunta ne’ebé sei sai Trabalho de Casa ba ita hotu nu’udar jerasaun foun, mai ita hanoin lisuk._          

Tuesday, January 30, 2018

Nahe Biti Boot (e.p 127)

Mama-fatin lalook hatuur iha oin
Bua malus tabaku lok ba ó mama

Ita mama hamutuk fuma hamutuk
Hahú hanoin tesi ita lia.

Hanoin didi’ak tetu loloos
Tesi lia didi'ak tuir lia-loos.
~o0o~

Saturday, January 27, 2018

Kalan Malirin (e.p 126)

Rai kalan malirin, nakukun no badín
Grilu oan hananu sai sasin kmesak
Teki-tekir anin boot sasurut aitahan maran
Alerta ba ema kadi kuda-kuda.

Kalan malirin iha knua laran 
Babeur na’in-rua monu tentasaun
Taka manta oan ida, hanas-an ba malu
Ibun badaen menas malu la kotu biban oan ne'e. 

Tilun hun manas haluha rai
Ohin kalan, kala mundu ita rua nian
Furak naresin lahanesan baibain 
Tama to’o rai naroman istória iha.
~::~