Saturday, April 7, 2018

Lala’ok Domin nian (e.p 136)

Lala’ok Domin nian

Hosi o-nia fuk ha’u haree anin tasi
Hosi ó-nia isin ha’u horon tasi is
Ha’u la
presiza ó-nia beiju mai ha'u,
Ha’u hakarak liu ó hakoak ha’u
Ha’u la hananu tanba ha’u la hatene
Karik ha’u hatene, ha’u sei hananu ba ó melodia furak
Knananuk dadolin iha ha’u-nia moris.

Hosi tempu ba tempu, ha’u sala dalan
Dalan bobar durante ha’u-nia viajen
Ha’u bobar demais, buka aifunan ne’ebé lakon
Ha’u sente la sama rai, namlele iha rai-leten
Hosi matabeen be ha’u haree hetan
Hosi oin be kamutis maibé moris
Ha’u rai lembransa mehi moris nian.

Keta obriga ha’u atu para hadomi
Ha’u hakarak liu ó bolu ha’u-nia naran
Ha’u sei iha biban, ó labele oho ha’u an tomak
Ó halo lai knananuk ida mai ha’u
Knananuk melodia ne’ebé perfeita
Labele husik ha’u
mesak biban rohan ida
Tuir netik ha’u liuhosi raihenek leten
To’o ikus, ha’u sei hetan rasik dadolin murak
ho perfeita 
Lahatene loos iha-ne’e ka iha mundu
ne’ebá.
…
(foto kortezia internet)

Wednesday, March 21, 2018

Knua Doben (e.p 135)

Knua Doben
-
Ha'u hanoin fali 'Teki nurak' oan sira, ha’u-nia knua!
Knananuk furak, dansa tebe-dahur, susar atu haluha
Hanoin hela dalan terik oan, ha'u ain fatin
Manu-fuik hananu, badinas simu malu
Hananu simu malu, hodi hein oras.
-
Hanoin metin knua oan ha’u moris ba
Retratu kapás rai hela mai ami
Loro-matan lokraik haksumik an
Grilu akompaña hananu krish krish krish…
Kasu hela mai ha'u, knananuk kontemporánea.
-
Hanoin hela rai tetuk oan, mota ninin no foho lolon
Bee kadoras suli tun liuhosi agriaun, ortalán, kabura let
Tua midar furin mutin, turu tun ai-tahan maran
Samtuku tahan tebar, funan mutin, mahon malirin
Tua-sabu suhan morin sai hosi alambike super tradisionál.

To’os na’in hananu hakfuik, bolu asu tuir dalan fila bá uma
Sinál serbisu remata, fila hein aban
Koitadu mai ha’u, oras-ne’e sente de’it mak nostaljia
Tempu joven nian, liu ona la fila teni
Bainhira hanoin kona, sai fali nostaljia fuan triste ida!
…

Sunday, March 18, 2018

Hakaran Ha'u-Nian (e.p 134)

Hakaran Ha'u-Nian

Ha’u hakarak hariis udan
Ha’u hakarak horon morin natureza nian
Ha’u hakarak ain tanan sama rai leten
Ha’u hakarak bee suli duni hosi bee-matan
Ha’u hakarak horon mós aifunan morin
Borboleta semo hadulas, maña an ba malu
Bani sira semo hananu ho lian baixu
Nehek no karakól dolar bamai
Ida-idak tuir nia dalan.

Ha’u hakarak sui fali fuk ho sasuit karau dikur
Ha’u hakarak hatais kamiza o.b. ida
Bolsa naklés no folin laek
Ha’u hakarak haree fali labarik sira tebe 'jambua okir'
Labarik sira haksoit borraxa ho haksolok
Tiru berlindis no hana kaleik
Ha’u hakarak haksolok no hamnasa tuir sira
Ha’u hakarak mós rona lian hakilar
Lian hakilar ne’ebé furak la sura
Furak naresin hosi ema bé sente riku loos ona.
-o0o-

Friday, March 16, 2018

Koko Hatene Xina Lian (e.p 133)

Koko Hatene Xina Lian
-

Mai ita aprende ko’alia Xina lian 
Ó di’ak ka lae: “nǐ hǎo ma” 
Ha’u di'ak hela: “wǒ hěn hǎo” 
Ha’u hadomi ó dehan: “wǒ ài nǐ” 
Ó hadomi ha’u dehan: “nǐ ài wǒ” 
Fó obrigadu ba dehan: “xiè xiè”

Ema Jinjang ko'alia Tetun la moos
Pronúnsia Tetun tuir nia dalen
“Koreka hakala sosa saira”
Ne’e katak: kolega hakarak sosa saida
Loke ita tilun koko kumpriende
Nia ko’alia hanesan han etu manas.
-o0o-

Wednesday, March 14, 2018

Domin Rohan Laek (e.p 132)


Domin Rohan Laek

Oan Mane mau
-mesak la’o lemorai
Hetan Noi bimesak domin dokorai
Família hamutuk dudu ba oin
Sinu Igreja dere lian domin rohan laek.
-
Nota:Poema ne’e hakerek no publika ona iha facebook iha loron 10 Outubru 2016