Friday, February 2, 2018

Mai ita hanoin lisuk

Situasaun  polítika ohin loron iha TL hanesan loloos ho polítika '75 nian, bainhira iha biban ne’ebá eziste partidu ki’ik 2 (Kota & Trabalhista) plus partidu boot 3 (UDT, Apodeti, Fretilin). Partidu ki’ik rua ladún iha militante, UDT-Apodeti lakohi UKUN-An, Fretilin mak partidu úniku ne’ebé defende UKUN-An. Bainhira UDT hahú hamoris golpe iha 11 de Agosto 75, Fretilin mós hahú harii FALINTIL hodi responde ba golpe iha 20 de Agosto 75, tiru-malu manas liután iha Dili laran, entaun lider UDT&Apodeti sira barak mak halai ba Indonézia via Mota-ain. UDT-Apodeti bá husu Indonézia hodi mai invade Timor. Fretilin sente ameasadu, entaun Fretilin hahú proklama Independénsia unilateralmente iha 28-11-75. Liu de’it loron sia nia laran, iha 7-12-75 Tropa Indonéziu ho Partisan timoroan ne’ebé anti Fretilin tama iha Dili. Fretilin mantein nia pozisaun, halai ba ai-laran hodi defende UKUN-An no rejiste nafatin durante tinan 24 nia laran. Militár Indonéziu nian hamutuk ho lider UDT-APODETI sira hahú deskreve Fretilin ho liafuan GPK (Gerombolan Pengacau Keamanan [Grupu Perturbadór Seguransa]). Populasaun hosi distritu mai Dili tenke lori SURAT JALAN (Guia da Marcha), sé mak la lori Surat Jalan sei konsidera nu’udar “orang berkepala dua”, GPK / Fretilin etc. Sira hakarak troka naran Fretilin ho liafuan GPK hodi hatudu ba mundu katak Fretilin la eziste ona, só eziste de’it mak GPK. Sira hanorin povu oinsá atu anti ba Fretilín.   

Maluk doben sira,
Ohin loron ita UKUN-An ona, situasaun polítika hanesan nafatin ho '75, ho ambisaun polítika ne’ebé boot demais, obriga partidu polítiku seluk atu anti nafatin ba Fretilín. Nu’udar ita haree ba istória 75 nian, UDT-APODETI mak anti Fretilin; entre '76-'99, UDT-APODETI nu’udar integrasionista ne’ebé bá bolu Indonéziu mai invade TL aumenta liután anti ba Fretilin tanba haree klandestinu oan sira-nia atividade anti Indonéziu nian. Ohin loron UKUN-AN ona mós partidu hirak-ne’ebé sikat ho ex Oportunista/ex Autonomista sira kria nafatin imajen anti ba Fretilin ho nia lideransa sira. Bainhira loos mak bele iha kompetisaun ne’ebé saudavel entre militante ho militante, no entre partidu ho partidu, no bainhira bele halakon linguajen ne’ebé la apropriada, bainhira loos mak ema ki’ik bele respeita lideransa liuliu lider istórika sira. Pergunta ne’ebé sei sai Trabalho de Casa ba ita hotu nu’udar jerasaun foun, mai ita hanoin lisuk._          

Tuesday, January 30, 2018

Nahe Biti Boot (e.p 127)

Mama-fatin lalook hatuur iha oin
Bua malus tabaku lok ba ó mama

Ita mama hamutuk fuma hamutuk
Hahú hanoin tesi ita lia.

Hanoin didi’ak tetu loloos
Tesi lia didi'ak tuir lia-loos.
~o0o~

Saturday, January 27, 2018

Kalan Malirin (e.p 126)

Rai kalan malirin, nakukun no badín
Grilu oan hananu sai sasin kmesak
Teki-tekir anin boot sasurut aitahan maran
Alerta ba ema kadi kuda-kuda.

Kalan malirin iha knua laran 
Babeur na’in-rua monu tentasaun
Taka manta oan ida, hanas-an ba malu
Ibun badaen menas malu la kotu biban oan ne'e. 

Tilun hun manas haluha rai
Ohin kalan, kala mundu ita rua nian
Furak naresin lahanesan baibain 
Tama to’o rai naroman istória iha.
~::~

Friday, January 26, 2018

Mensajen PR ohin nian


Mensajen na’i Prezidente da Repúblika ohin iha Palásiu Prezidente:
Iha alínea ikus:
Mai ita hotu bá Vota filafali iha Eleisaun Antesipada hodi haforsa Demokrasia no Estadu de Direitu. Prezidente da Repúblika deside tuir artigu 86 alínea F Konstituisaun da Repúblika, atu disolve Parlamentu Nasionál!. Prezidente da Repúblika sei marka data ba Eleisaun Antesipada tuir Lei haruka,  Viva Timor Leste Livre no Intependente! Viva Demokrasia! Viva Povu Doben Timor Leste!

Thursday, January 25, 2018

Tatoli Foun (e.p 125)



Ohin kalan toba di’ak hodi hein menon
Menon foun Madohi kasu mai ita
Kasu mai ita sei belar ba malu
Belar da'et ba malu kaer knaar foun

Fulan neen nia laran hare la buras
Fulan neen nia laran hare la ko’a
Ita hotu sei simu menon foun mai
Tatoli mai ita kaer knaar foun
~o0o~

Wednesday, January 24, 2018

Foto Nu’udar Sasin (e.p 124)





Foto Nu’udar Sasin

Tesi fuk bonitu patarata loos
Koi moos hasarahun hasai tiha foto
Friza fuk kabeer hasai tiha foto
Pinta hotu liman-kukun hasai tiha foto
Hatudu ba kolega: ha’u makne’e
Hatudu mós ba doben katak foin mak prontu
Foin mak prontu doben hein tan uitoan
Hein tan uitoan ita rua sei bá
Ita rua hamutuk dalan ida de’it.
-.-