Monday, October 29, 2018

Loron Matebian iha Knua (e.p 147)


Tinan tinan atu tama fulan Novembru
Sarani rai laran prepara-an.
Prepara-an ba loron matebian
Prepara-an hakat bá foho.
Hakat bá foho, tama knua matan
Hakat bá knua, tan Uma no Ahi.

Foho oan la’o-rai, belar rai Dili
Lemo mai rai Dili, buka anin foun.
Rai Dili nu’udar To’os ba futuru
Rai Dili nu’udar Jardín esperansa.
Harohan ba Na’i, tulun matebian
Espíritu matebian, tulun mós ita.

Nu’udar sarani, ha’u harohan
Nu’udar sarani, ha’u hamulak.
Harohan hamulak iha rate oin
Hakarak ko’alia ho matebian.
Lahatene, matebian rona ka lae?
Lahatene, Maromak simu ka lae?

Nu’udar sarani, reza tuir doutrina Na’i hanorin
Domin boot laran moos, fé mós forte
Harohan la para orasaun la kotu
Hodi Padre hodi Filho hodi Espírito Santo.
~::~

Monday, August 20, 2018

FALINTIL Liman Kro’at Povu Nian (e.p146)

Bodas de Ouro dia das FALINTIL 
1975-2025
La‘ós lia anin, la’ós manu lian
Istória hakerek, kilat musan tarutu funu nakfera!
Loron Onze de Agostu, 
hitunulu resin-lima
Hahú nakfera hosi UDT, 
tarutu nakfera abut UDT.
Loron 9 nia laran hahú responde
Maun- alin/ alin-maun ran nakfakar!
Fatin Dadur Palapasu 
testemuña ba istória.

Loron Vinte de Agostu loron reasaun
FRETILIN hamriik harii FALINTIL!
FALINTIL nu'udar 
liman kro’at povu nian
Hamriik alerta fó resposta
Kumu liman hakilar "A Luta Kontinua"!
Loron ida ohin,
wain ida ohin
Ha’u katak ba ó,
kasu tutan ba sira jerasaun foun
Loron ida ohin, loron FALINTIL
Wain ida ohin,
loron istórika.
-
Viva tinan-50 loron Falintil!
Vitória é Certa!
A Luta Continua!
Unidos Venceremos!

-
hakerek iha 20-08-2018
-
foto kortezía ha'u foti sein lisensa

update iha 20-08-2025 hodi selebra Bodas de Ouro 1975-2025 loron FALINTIL 

Friday, August 10, 2018

La Kabas Rahun La Borboleta (e.p 145)

Ó mai hosi oin, sama hetan nia
Nia hakfodak namkari, semo loro leten
Ha’u hasoru karik ó, sama kona nia
Nia hakfodak namkari, semo liután

Sira tuir ha’u kotuk, simu tutan nia
Sidi nia namkari, semo bá beibeik
Nia kor malahuk nu'udar manu falur
La kabas rahun be la la'os borboleta.

Nia mak rai rahun estrada foun
Bamai lorosa’e, liu Hera Metinaru sei simu nia
Bamai loromonu, hosi Tibar Tasi-tolu sei simu nia
Liu bá liu mai sei horon nia
Nia mak belun at lurón nian.

Nia mak rai-rahun estrada nian
Prepara ó-nia óklu, hatook ó maskra
Tau oklu ó matan, sulan metin ó inus
Rai rahun lurón la hili maluk.
~..~

Wednesday, August 1, 2018

Knananuk Antiga Poezia Foun (e.p 144)

Hori tempu uluk labarik na’in-tolu la’o rai
Despede inan aman bá buka rai dook
To’o iha dalan klaran, fila oin ba kotuk
La’o de’it ho matan-been. 
-
Iha fulan kotuk, ha’u-nia maun na’in-tolu doko rai
Simu malus juramentu, hadulas rai laran
To’o iha dalan klaran ko’alia la rona malu
Se kotuk ba malu ho laran dodok.
-
Saida mak inan saida mak aman
Inan-aman nia ko’alia nu’udar bukae
Saida mak maun saida mak alin
Maun alin na’in tolu bukae laek. 
~::~

Saturday, July 28, 2018

Matadalan Di’ak (e.p 143)

Matadalan hatudu dalan ba alin
Rai badak ka as alin la’o rasik
La’o ho kuidadu bele to’o rohan
Kuidadu keta sidi iha dalan klaran

Maun sira kuda hela aifuan di’ak
Atu midar ka moruk alin koko rasik
Koko rasik tuir gostu tuir vontade
Kaer koko han koko tolan didi’ak.

~::~

Monday, July 23, 2018

Hamnasa Mak Ha'u Matawen Ne'ebé Subar (e.p 142)

Hamnasa ha'u hamnasa
Haksolok ha'u hatudu
Oin-midar ha'u fó
Husik terus ha'u subar
Haksoit kontente ha'u haksoit
Knananuk furak ha'u hananu
Hamnasa beibeik la hatudu tristeza
Matabeen monu subar habokon fuan
Hafalun tristeza ho kontente
Tanis nonook hodi subar
Husik moras hakoak ha'u
Hamnasa mak matabeen ne'ebé subar

 ~::~

Hakerek iha Dili, 20-07-2018 
Autora: Maya Amazhora F'Minoz
 ~
Nota: Poema ne’e la’ós ha’u mak kria maibé Autora (hakerek-na’in) mak Maya Amazhora F'Minoz, 
ha’u kópia mai iha-ne’e bazeia ba kompromisu/ autorizasaun entre ha’u ho autora.   
~..~


Wednesday, July 18, 2018

To’os Sei Badiin (e.p141)


To’os boot remata sei badín
Atan oan  lere hotu hein be hein
Hein be hein maun sira atu kuda
Maun atu kuda karik, kuda fini moos.

Fini moos fini di’ak Atan oan hein
Kuda batar  remata Atan ba serbisu
Kuda hotu batar, kuda mós aifarina
Aifarina nu’udar pão de Maubere.

~..~