Tuesday, October 7, 2008

Tansá Samoro ho Laclubar Fahe Malu iha Biban ne'ebá (Istória)

Hori uluk bainhira ema Portuguesa sira ukun rai Timor molok tama ba sékulu XIX (19) birokrasía Portugués nian sei la'o sabra’ut iha rai Timor laran tomak, povu Laclubar tama hamutuk ho povu Samoro halo ida deit maibé seidauk hanaran hanesan sub-distritu. Soibada sai koiñesidu uluk tanba Misionáriu Jesuita sira ba harii uluk Uma-kreda no Misaun iha rai Samoro-Soibada. Rai ne’ebé liurai tuur ba naran Samoro, no fatin ne’ebé uma-kreda ka misaun hamriik ba ho naran Soibada.
Iha katuas oan ida naran Leki-wa’in ho naran koiñesidu Lekituk tanba nia isin metan no badak tuk oan, nia ko’adór tua iha "Susuk-Orlau" Laclubar nian. Loron ida iha dadersán, nia ba ko’a nia tua, bainhira nia sa'e to’o iha tua tutun nia hasai au-doran, nia hakfodak tanba kamán tiha ona, ema ida ba na’ok uluk tiha. Aban dadeer nia ba fali mós hanesan, tua laiha tanba ema balu na’ok tiha ona. Entaun nia iha planu ida, nia halo tiha hadak oan ida iha tua hun nia hodi toba hein nia tua. To’o aban dadeer nia sa’e mós hanesan, ema balu sa’e uluk tiha ona, prontu, entaun nia mós lakohi atu lakon nafatin, nia planu foun fali ba halo hadak iha tua leten besik kedas tua liman ho au-doran ne’ebé tara ba, no nia hahú toba iha leten ne'ebá duni, to’o dadersán madrugada saida mak akontese, nia sei toba hela nia hakfodak tanba teki-tekir buat ida mosu iha nia sorin, nia haree ba:
FITUN-MEAN ida maka hemu hela tua ne’e. Nia lolo liman neneik nia kaer tiha FITUN ne’e, FITUN hakfodak husu deskulpa ba nia hodi hatete: Favór ida ó husik tiha ha’u ba maka ha’u fó buat ida ba ó, ó bele sai rikásu boot ida iha rai ne’e. Lekituk hatán ba nia: Ha’u lakohi atu sai riku maibé ha’u hakarak ó fó deit matenek no politik mai ha’u, tuir mai FITUN hanoin tiha lai oitoan molok fó desizaun. Nune'e, FITUN hasai IKAN-OSAMUTIN ida ba Lekituk hodi esplika ba nia : Ó simu ida ne’e rai didi’ak tanba nia mak sei fó matenek no politik ba ó. Lekituk mós simu ho laran haksolok tanba nia hetan ona buat di’ak ida, rai mós besik naroman, FITUN ansi atu fila ona, nune'e sira na’in rua haku’ak malu hodi despede, FITUN semo fila ona no Lekituk mós fui nia tua ba nia au-lalin no ko’a kedas tua-liman molok atu tun fali ba rai.
Uluk, iha tinan-tinan Laklubar sempre lori lilin no kábas ba hatama iha uma kreda Soibada. Tanba fitun-mean maka fo sorte ida liu hosi IKAN-OSAMUTIN ne’e maka Lekituk hahú harii nia planu no estratéjia iha nia ulun atu hamenus ona lilin no kábas nia forma husi bokar boot sai ki’ik-oan no lotuk fali. To’o duni nia biban, iha loron páskoa ida Lekituk ba Soibada ba hatama lilin ho kábas ba uma-kreda liuhosi sarjentu-guarda sira. Iha biban ne'ebá sarjentu-guarda husi Manlala, nia haree Lekituk hasai nia lilin ho kábas hosi nia bornál tau iha hadak leten sarjentu-guarda hakfodak tanba lilin ho kábas mesak ki’ik oan deit, sarjentu-guarda hakilar Lekituk hodi tolok dehan: Hai Lakituk! Ó lori ó nia lilin lotuk hanesan ó nia kain, ó lori ó nia kábas-lahon lotuk hanesan ó nia fulun!!! Lekituk hakfodak no hirus tanba sarjentu-guarda Manlala tolok nia hodi simu hasoru dehan: prontu !!! Ó tolok ona ha’u, entaun ha’u lalika tur kleur tan, ha’u tenki fila ona, no ha’u sei lasama tan ain iha rai Samoro. Lekituk mai fo hatene buat ne’ebé akontese ba nia iha Samoro ba na'i ulun komunidade sira no sira foti desizaun atu labele ba lai Samoro bainhira seidauk rezolve.
Governadór iha biban ne'ebá tuur iha Lahane rona problema ne’e bolu kedas liurai Samoro ho Lekituk mai hatán. Lekituk to’o uluk iha Palásio governadór nian iha Lahane, governadór investiga hotu tiha Lekituk entrega farda ho xapéo koloniál ne’e ba Lekituk hatais tiha, haree ba liurai Samoro mosu ona hosi dok governadór subar tiha no haruka Lekituk tuur hela iha governadór nia eskritóriu, liurai Samoro tama ba la koiñese tiha Lekituk no fó Tabé ka kumprimenta tiha ba Lekituk: Boa tarde señor governadór! Lekituk mós hatán: Boa tarde na’i liurai.
Governadór sai mai hamnasa hatete ba sira na’in rua hodi dehan: Hahú loron ohin ba oin imi na’in rua Don hotu, Samoro iha Don, Laclubar mós iha Don, Leki-Wa’in ka Lekituk ohin ha’u fó naran :Don Geraldo, rota ne’e hodi ba haree ó nia emar sira. Hosi parte igreja nian Laclubar bele rona nafatin ba Uma-kreda Soibada, no hosi parte governu nian Soibada iha Suku Samoro nia ukun sei rona ba postu Laclubar. Dom Geraldo...simu ba Rota-murak ida ne’e atu hodi ukun loos deit ó nia emar sira iha rai Laclubar. Ho nune'e Samoro iha Don, Laklubar mós iha Don maka Don Geraldo.
===================================================

Friday, October 3, 2008

Sasin-matan na'in sira ba Oho MAHUDU iha 9-9-'99

Manuhain - Sanirin - Balibo - Bobonaro/Maliana
-
Fatin ida ne’e naran Manuhain, Sanirin, sub-distrito Balibo, distrito Bobonaro, iha tetuk ne’ebé liu tiha Atabae, Palaka, molok atu tama ba kruzamentu (+/- 1,5 km) hodi fahe estrada ba fronteira Mota-ain no Bobonaro/ Maliana. Ha’u hamrik hamutuk ho sasin sira ne’ebé hakoi matebian JOSÉ DA COSTA ne’ebé koiñesidu mós ho naran MAHUDU, lideransa rejistensia nian ida ne’ebé TNI ho milisia sira kaptura nia hosi Kupang lori mai oho fali iha Manuhain-Sanirin iha loron 9 fulan Setembro tinan 1999 dadersan madrugada. Mahudu nia rate iha fali ami nia kotuk mais ou menus metru 60 hosi ami hamrik ba to'o rate. Iha ne'ebá rate mesak ida deit, maka Mahudu nian.
Ami ba koko husu Vítima nia kaben atu Ke’e hikas Rate hodi hasai restus mortais atu hala’o Autópsia iha Laboratóriu Forensik nian maibé Vítima nia kaben rejeita tiha, ho rajaun katak oras ne’e "GOVERNU TAKA MATAN" tiha ba sira nu’udar família vítima nian. Vítima hatutan tan katak di’ak liu ba ke’e uluk matebian sira ne’ebé mate durante tinan 24 nia laran afoin ikus liu maka mai ke’e ha’u nia la’en, oras ne’e ha’u seidauk bele autoriza, husik ba ha’u nia la’en toba nonók iha nebá ba.

Koronel Santo António, Padroeiro Manatuto (Espresaun PoéTika III)



Koronel St. António
Padroeiro Manatuto
-
Ami foti, ami tane, no hahii,
Ami fiar tau neon ba Na’i Santo.
Tau matan mai ami Manatuto oan
Sara netik ami hosi susar nia laran.
Satan metin ami hosi ema neon fo'er
Hosi neon fo'er atu sobu unidade
Hanoin at hodi babeur ba sala.
-
Loron sanulu resin tolu kada fulan Juñu
Loron ida ne’e Na’i Santo nian
Ami hotu halibur hodi haksolok
Ami bidu hakse’ek hodi selebra
Selebra  hamutuk hodi hahii
Sa’e kuda, tuda sanan tuir lisan nian.
-
Na’i Korenel Santo Antonio
Liurai boot Manatuto nian
Mai vizita ami tuir oráriu
Mai horik ho ami tuir programa.
Hateke netik mai, ami Bairru laran,
Simu netik ami ba, ami-nia harohan.
Na’i Koronel, aman doben nakonu tebes ho domin
Aman doben nakonu tebes ho Pás.
~o0o~
.
Dili,3 Outubro 2008 - 
tk 10:28 dadér
had'i fali iha 9-6-17

*************************************

“Kabizada matu let Bobu be manán”

Ha’u hakarak dadalia badak kona-ba loron Santo António-padroeiru Manatuto nian iha rai Manatuto. Eventu ne’e akontese de'it iha Manatuto vila kada tinan iha loron 13 fulan Juñu, bainhira estátua Santo António sei entrega responsablidade ho simbólikamente ba suku ida durante tinan ida laran hafoin tinan oin mai suku ida ne’e sei entrega fali ba suku seluk bainhira misa remata. Tuir fali, sei loke ho feira karik situasaun admite, tanba dalabalu feira laiha, maibé selebrasaun simples hanesan tinan-tinan hala’o nafatin, povu sira komesa ho bidu hakse’ek to’o loromanas tuku rua ka tolu kontinua ho “tuda sanan rai”. Iha programa tuda sanan rai sei hala’o hosi Kabizada sira (mane sira ne’ebé hafutar ho tais kompletu hodi sa’e kuda [kavaleiru]) maka sei tuda sanan ne’ebé tara prepara ona iha ai-riin tutun, ai-riin rua ho travesaun hanesan loloos baliza riin maibé as liu ho nia altura kuaze metru 6 nian. Sira sa’e kuda halai bamai hodi tuda taru sanan, tuir fali sira lori fali ai naruk ida kesi ho ai ka’it oi-oin hodi ka’it osan ne’ebé tara hela iha as ne’ebá. Bainhira sira ka’it metin lori ba sira, maibé karik monu ba rai entaun Bobu, naran hosi grupu ida ne’ebé taka máskra hafutar-an sabra’ut ne’e maka sira sei hadau malu ba osan rahun ne’ebé monu. Tanba-ne’e mak iha liafuan koñesidu ho “Kabizada matu let Bobu be manán”, signifika “Kabizada/Kavaleiru sira Kole Let Bobu maka manán” tiha. Jogu ka demonstrasaun ida-ne'e sei hala’o to’o remata. Autór prinsipál iha jogu ne’e maka Kabizada ho Bobu, Kabizada hafutar-an ho tais hodi sa’e kuda no Bobu taka máskra halo oin fo’er sabra’ut tal forma hanesan karnavál hodi hein hadau de'it sasán/osan rahun ne’ebé falun ho lensu no tara iha ai tutun. Ne’e maka lisan ida ne’ebé nunka lakon bainhira to’o eventu selebrasaun loron Koronel Santo António nu'udar Padroeiru Manatuto nian._

BIODATA BADAK SANTO ANTÓNIO NIAN 

Loron 13 Juñu ita selebra memória santu populár – doutór Kreda nian – ne’ebé moris iha Lisboa, iha tinan 1195, no mate iha tinan 1231 besik kedas sidade Pádua [Padova], iha Itália, tanba ne’e mak koñesidu nu’udar Santu “António de Lisboa” ka “de Pádua”. Ninia naran batizmu nian mak Fernando de Bulhões y Taveira de Azevedo.
Iha tinan 15 nia tama iha orden S. Agostinho nian, estuda Filozofía no teolojía to’o ordena ba amululik, maibé liutiha tinan 10 nia sai fransiskanu, orden menór S.Francisco de Assis nian. Mudansa ne’e tanba nia hakarak haklaken Evanjellu ba musulmanu sira. Nia bá Marrocos, maibé tanba moras nune’e António tenke fila, no providensialmente nia hasoru “il Poverello di Assisi”, ne’ebé autoriza nia atu hanorin frade siénsia sira ne’ebé tulun Irmaun sira moris Santu Evanjellu.

Don espirituál estraordináriu oioin, St. António iha don espirituál estraordináriu oioin. Ninia lian klaru/moos no forte, ninia aparénsia imponente, ninia memória prodijioza, ninia koñesimentu kle’an, aleinde iha espíritu profesia nian no don estraordináriu milagre sira-nian. “Menino Jesus” mosu ba nia, no nia ko’us iha nia liman sira – no tanba ne’e mak ninia ilas sira hatudu nia ko’us Kosok-Oan Jesus.
St. António koñesidu nu’udar santu “milagrozu”. Ninia fama halo milagre kontinua to’o ohin loron. Entre milagre wa’in, milagre famozu ida mak “tesi-kotu ain”. Iha Pádua, durante momentu hirus to’o raan-nakali ida, foin-sa’e ho naran Leonardo tebe ninia inan rasik no, arrependidu, nia ba konfesa ho St. António, ne’ebé, atu hatudu ba nia salan ne’e ninia todan, dehan ba nia: “Ain ne’ebé tebe ninia inan rasik merese tesi tiha”. Leonardo halo tuir liafuan sira ne’e no tesi kotu nia ain. Bainhira St. António rona, nia halo atu joven ne’e nia ain liga metin fali ba ninia isin.

Milagre seluk estraordináriu liu mak “ereje nia kuda-burru”. Ereje albijense ne’e baibain ona diskute malu beibeik ho St. António kona-ba fiar katólika, maibé nunka manán. Nia propoin ba St. António atu hatudu katak Jesus iha duni Óstia Santa:
“Ida-ne’e mak ha’u propoin: iha ha’u-nia uma iha kuda-burru inan ida: ha’u sei sulan nia loron tolu no la fó han, hafoin ha’u sei lori mai prasa ida-ne’e. Entaun iha ema hotu nia oin, ha’u sei fó du’ut ba nia han. No ita aprezenta ba nia buat ne’ebé ita dehan Jesus Kristu nia isin. Se balada hamlaha ne’e husi- hahán atu halai ba Maromak ne’e, ne’ebé tuir ita nia doutrina kriatura hotu tenke adora, ha’u sei fiar ho fuan toma Kreda Katólika nia hanorin”.

Iha loron markadu, ema barak husi parte hotu hakonu prasa atu realiza prova boot ne’e. Katóliku sira no ereje sira, hotu-hotu hein. Frei António selebra Santa Missa ho laran-manas iha kapela ida iha prasa sorin. Lakleur mai ona albijense, dada nia kuda, no maluk seluk lori hahán ne’ebé kuda ne’e gosta… Iha momentu ne’e St. António sai husi kapela, ho sibóriu ho Santísimu Sakramentu. St. António ko’alia ba kuda-burru ho lian maka’as nune'e: Hodi ó-nia Kriadór nia naran, ne’ebé maski ha’u la soi, ha’u kaer metin prezente loloos iha ha’u-nia liman, ha’u fó orden, balada kiak: mai lalais hakru’uk ho haraik-an iha nia oin. Ereje sira tenke rekoñese katak kriatura hotu hakru’uk ba Jesus Kristu, Maromak Kriadór, ne’ebé iha onra atu tun iha altar leten!” Iha tempu hanesan, albijense ne’e ta’u duut ne’ebé kuda gosta iha nia ibun okos, hodi haruka nia han.
Milagre ne'e halo hakfodak ema sira ne’ebé haree! Kuda la liga hahán ne’ebé fó ba nia, rona mak Frei António nia lian, balada ne’e hakru’uk bainhira rona Jesus Kristu nia naran no hafoin hakneak iha Sakramentu Moris nia oin, hanesan adora nia.

Haree ida-ne’e katóliku sira haklalak ho entuziazmu enkuantu albijense sira hakfodak iha konfuzaun. Kuda nia na’in mantein ninia liafuan onra nian ne’ebé nia fó ba Santo António, hakribi erejía no sai oan fiél Kreda nian.
Mundu tomak nia santu Papa Leão XII hanaran St. António “mundu tomak nia santu”. Ida-ne’e tanba ninia devosaun habelar maka’as, nia sai padroeiru ema kiak sira-nian, la’o rai sira-nian, pedreiru sira-nian… Aleinde ne’e, ema buka St. António nia tulun atu hetan la'en ka feen ida ne’ebé di’ak, ema ruma lakon sasán mós husu ninia intersesaun atu bele hetan filafali.

Santo António serví ninia família fransiskana liuhusi kargu aas iha Orden, to’o mate ho tinan 36 ba moris ida-ne’e no tama iha moris rohan-laek. St. António ninia kanonizasaun lalais liu iha istória tomak. Papa Gregório IX kanoniza nia la to’o tinan ida ninia mós mate, iha Pentekostes tinan 1232 nian, ne’ebé monu iha loron 30 Maiu._

 

Wednesday, October 1, 2008

Biblioteka ONU Nian

Lorokraik ida iha segunda-feira loron 29 Setembru 2008, kolega Abé Barreto konvida ha’u ba partisipa iha eventu simples oan ida iha Biblioteka ONU nian, hodi hanoin nafatin ba selebrasaun  loron Pás Munidiál nian ne'ebe monu ezatu iha 21 setembru, no iha ne’ebá ami hahú rona múzika "Imagine" husi John Lennon nu'udar kontemplasaun/ renungan ida. Tuir fali, tama ho lee poezía husi kolega mane Sieraleon ida naran Abdul Karim, ha’u haluha tiha títulu poezía nian, hafoin tama fali ho múzika "Oh rai Timor" hosi joven Abétu, no hotu fo tempu mai ha’u hodi lee ha’u-nia poezía ho títulu “emboot rai nian” hanesan iha kraik ne’e. Hotu tiha kolega João Paul (ema Portugues) ida, lee nian testu ida ho títulu "a raposa" nst. To’o serimónia remata, ami fahe malu no kolega Abé sei  konvida ha’u ba janta hamutuk iha Tropical Bakery (kantu Vila Verde) nian, nasi rendang plus sate ayam oan ida. Foin atu remata Abé nia ferik-oan mós to’o ho nia oan-mane Abas, labarik-oan ne’e mós engrasado no nakar lolós hanesan nia apá uluk sei ki’ik, he he he.

Monday, September 29, 2008

Emboot Rai Nian (Espresaun Poétika II)

Emboot Rai Nian
-
Liana’in Timor nian - mak Ita-boot
Fiar na’in Timor nian - ha'e Ita-boot
Ema barak hatene - hosi Ita lian
Mundu balu hakru’uk - tan Ita lian
-
Ita tane no bali - tuir Ita kbiit
Ita tetu no kesi - tuir Ita beran
Kbiit ida Ita iha - hodi tau matan
Beran ida Ita iha - hodi fó laran
-
Tarutu ida mai - loke Ita neon
Loron Onze Fevereiru - loke Ita matan
Tau matan badínas - tane Ita rain
Loke ibun kuidadu - foti Ita fama.
~::~

Thursday, September 25, 2008

Selingkuh


Hori sehik lorokraik mais ou menus iha tuku 6 ho balu iha uma situasaun sai manas oitoan tanba problema “selingkuh” ne’e. Ho teki-tekir tia M sa’e mai hosi kraik hodi husu ba koiñada ki’ik Ag: hai ó rona duni dehan ó nia tiu M selingkuh ho feto ki’ik ida ne’e lós ? koiñada ki’ik hatán ho pozitivu…tiu D iha uma sorin mós mai fortifíka liu tan…tuir fali kontinua tan ho prima L ho nia la’en káben L nian mós…koalia ba koalia mai, konta ba konta mai to’o derepente ha’u nia káben simu ninían ida dehan: lóssss ohin loron ne’e katuas sira maka kaer lamétin fali, parése mundu atu nakféra ona karik ! ha ha haeeeeeeeeeee….ami hamnasa hotu tanba lia fuan “mundu atu nakféra ne’e”, koooomik pa!

Wednesday, September 24, 2008

Manas (Espresaun Poétika I)

Kalohan nakuhus foho Dare leten

Roda rua no haat suli bá mai
Anin hu namaus hu neineik
Hu neineik fahe is ba sidade
-
Hateke loro leten manas latahan
Hateke tun rai manas mós manas 
Loromanas meiudia hanas sidade 
Hanas husi dadeer to'o lorokraik

~::~

~~

Monday, September 22, 2008

Komemorasaun loron referendum/public consultation nian ba dala 9

(20/09/2001)
Iha loro-kraik molok atu tama ba tk.5:30 ha’u tama ho ha’u nia oan na’in rua Kanae ho Eben + Asinuk tama tiha ona iha Recreation Center Obrigadu Barak nian, ho objetivu atu mai akompaña serimónia komemorasaun ba loron rezultadu referendu nian ne’bé foin maka atu komemora ba loron ida ohin, sabadu loron 20 fulan Setembru tinan 2008.
Labarik na’in tolu han katupa ho manu-sona lótun ida-ida + coca cola, hau mós katupa ho VB ida.
Iha serimónia ida ne’e enxe mós ho aprezentasaun oi-oin hanesan dansa tradionais sira, múzika , fahe prezente ba sira ne’ebé manán iha kompetisaun hanesan: xadrés (catur), table tennis/pimpong, bulu tangkis, nst. Aleinde liafuan badak hosi sr.Athul Kare no Mariano Quintão nu’udar prezidente ba Nacional Union nian, no Abe Barreto nu'udar MC ba serimonia ida ne'e.
Ami enjoy tebtebes liu-liu tanba ha’u haré ba haú nia oan sira mós bele koñese ambiente OB nian, bele koinese tan hau nia kolega barak ne'ebe antes sira rona tiha ona kolega hirak ne'e sira naran maibe oan sira foin mai konese rasik iha ne'e... Ba ha’u la’os tanba komemorasaun deit maibé tanba ha’u bele lori ha’u oan sira mai haksolok hamutuk iha biban istorika ida ne’e. Ami fila uma sira na’in tolu lori ho bolão rua-rua to’o uma maske balu nakfera tuir dalan.

Monday, September 15, 2008

Mai Ita Hotu Aprende Halo Blog Iha Blog Laran

Ha'u lahatene tanba sá...? ha'u koko dala tolu ona ba ida ne'e... ha’u lakohi ona atu kontinua loke foun tan ba dala hat...tanba ida ne’e mai ha’u ba dala ikus ona dala uluk ho naran mamut maibé loke susar, ba dala rua ho naran anin-maus mas sei iha nafatin problema, entaun... ba dala tolu no dala ikus ona maka ne’e ho naran anin-maus.b, ho ida ne’e maka atu diak ka ladiak mós ha'u ba sei ba nafatin deit ona...tanba ha’u na’in sente komik fali...no mós ba maluk sira ne’ebé haré ka le ne’e sei hamnasa hotu tanba sa maka ema ida deit loke blog halo bara-barak nune’e....???? mai ita hotu aprende halo blog iha blog laran hodi haree sala no susar ne’ebé ita hetan iha blog laran, fatin ne’ebé sei foun ba ita hotu... mai ita ida-idak ke’e rai hodi harii blog ba ita an rasik komésa hosi fondási sa’e ba leten...mai ona ba !!!
iha kraik ne'e ha'u kópia fali hosi blog rua ne’ebé ha’u harí tiha ona maibé loke ladi'ak, maka hanesan mámut ho anin-maus ba dala uluk:
_________________________________ 08/09/10 *
Hai, Dekulpa tanba ha'u dehan ona iha biban hirak liu ba katak hau seidauk iha esperiénsia kle'an ba oinsá atu halo uza didi'ak BLOG hanesan ne'e...uiiiiipa!!! ha'u atu bulak sa ! bainhira ha'u uza naran "mámut" afinál ema uza uluk tiha ona, liafuan "mámut" signifika sente manas oitoan...atu diak liu ita uza lian indonezia nian oitoan katak "hangat" ka suam-suam kuku, entaun ha'u nia mámut tama da'et fali ba ema nia mámut laran..."kehangantanku menembus di kehangatan orang lain"...ha ha ha! Ho razaun ida ne'e maka ha'u hodi troka ses-án fali hosi mamut mai iha anin-maus ne'e...tanba se lae mámut ida uluk deskonfia katak hau hasara nia ?! entaun kolega sira, mamut ha'u tenki kansela no tenki tama fali kedas ida anin-maus ne'e. Obrigado, ha'u hein katak kolega sira bele ho laran kmán mai vizita hau ho lia anin-maus foun ruma.
*
Ohin loron ba dala rua ha'u koko hato'o tan ha'u nia lia menon oan ruma iha ne'e molok atu fila ba uma...no molok loro matan atu haksumik'an iha loromonu husik hela doben sidade Dili. Subrinha ki'ik oan ida mós ohin foin simu sakramentu batizmu, ohin meudia ha'u la ba almósu iha uma tanba servisu barak, diak liu lorokraik mak fila dala ida.Eben malandru ne orsida nia lohi fali ona hau dehan nia hemu tua lanu, hanesan loron rua liu ba nia ba iha nia kolega sarani mós...ha'u fila servisu nia dehan nia hemu tua lanu...ha'u husu nia: "o hemu tua mutin?" nia hatan mai hodi taka rabat ba kulzaun kama nia dehan "tua metan", pois nia toba ida ne'e to'o kalan boot nia hadé r mai ha'u husu nia hakarak han karik? nia dehan nia sei bosu hela...entaun nia konsege toba to'o dadér maka matabisu deit dala ida, Ebennnn,,,, Eben !!!
Sesta-feira, 2008 September 05

====================================

Primeira Vez ka Loron ba dahuluk ha'u hahú harii ha'u nia 'BLOG' ho rungu-ranga tanba esperiénsia ne'ebé sei limitadu hela.

Bem vindo

Loron Haksolok !!!
Loron ohin wain ohin, la loron leet la wain let, mai mutu malu mai tan malu, atu hodi selebra loron 5 fulan Setembru 2008 nu'udar loron istória ida ba maluk tomak iha território ida ne'e depois de liu tiha tina 9 nia laran povo Timoroan tomak simu rezultado Referendu nian ba ukun rasik-an iha biban ne'eba.Tuir loloos loron 4 Setembru hori sehik ami atu selebra ona maibé tanba tempo mak la-admite entaun ohin maka foin bele selebra. Ami ohin lanu hotu...hosi hau nia xefi ho kolega sira seluk, ami mesak hanesan deit...haree ba ida-idak nia oin mean hotu pa. Ami selebra deit iha ami nia eskritóriu depois de enkontru semanál iha ami nia eskritóriu. Ohin loron 5 fulan Setembru 2008 hanesan loron dahuluk mai ha'u tama no rejista iha ha'u nia blog ne'e.Hau seidauk iha koiñesimentu didi'ak oinsá atu uza no asesu ba blog hanesan ne'e, mas ha'u espera katak loron ba loron ha'u bele dezenvolve rasik através de sujestaun ruma hosi kolega ka hosi ha'u an rasik , ha'u mós bele hakerek ha'u nia poezia oan ruma, no mós istória moris loro loron nian pasu pur pasu...ha'u hein katak loron ruma kolega sira bele mai vizita iha ne'e. Benvindu no Obrigadu wa'in.